《小傳日記》上周五（１９日）希臘危危乎，花旗市都亦都冇運行，道指又要跌番１００點，萬八關再次受到挑戰。好彩，希臘總理都唔算好無賴，終於喺今日開緊急峰會之前，提交咗新債務計劃，稱之為「明確解決方案」，危機喺大限之前，總算有一線曙光喇！　　「孖屐」憧憬峰會達成協議，香缸好友今日（２２日）趁Ａ場休市就獨自開Ｐａｒｔｙ，齊齊夾高祖國移動（００９４１）、友邦（０１２９９）、ＱＱ（００７００）同大象（００００５），將大市推高３２０點；再加埋午後歐洲開市率先抽高慶祝，刺激香缸曾飆逾４００點，二萬七關眨吓眼就衝破。恆指收市升３２０點報２７０８０，國貨指數都有１９７點進帳，收報１３３８３。之不過，市況表面上係強番，但成交只得９０６億左右，大跌近３６巴仙，亦係３月底以來新低，睇嚟好友仲未成功扭轉弱勢喎。

＊希債有轉機魚缸立即飛，愈大愈美麗壽仔忽變肥＊

　　祖國移動呢排喺百元關水平上上落落，無咩起色，今日終於有Ｄ好消息刺激吓，公布上個月４Ｇ上客量微微加快咗，就足以氹到班粉絲掃貨支持，埋單收升２巴仙收１０１﹒５銀，連廿天線都衝破埋。　　友邦更加功不可沒，榮登另一功臣。話說瑞銀上星期五（１９日）出力唱好，升評級至買入，上望５７﹒５銀之後，友邦就承勢向上衝，散場彈高３巴仙收５２﹒８５銀；加上股王ＱＱ踢高２巴仙，大象尾市發力倒升支持下，四大藍戰士就合力推高大市１７６點，佔咗超過五成升幅，勁！仲有國壽（０２６２８）唔聲唔聲，原來下半場黑馬姿態跑出，啱啱贏友邦一個馬鼻，收３４﹒４銀稱冠。

＊中行縱頭痕街坊陪著漲，大和撥冷水賭仔同受傷＊

　　又有銀主涉及幫人洗錢，今次中招嘅就係中行（０３９８８）米蘭分行。外電報道，中行米蘭分行相當疑涉及洗錢，所以畀意大利政府調查。不過今朝公司股價無點跌，後來仲踢起２巴仙，報５﹒２４銀。街坊建行（００９３９）聽日除息今日就有好多大手，成交仲係全日最多嘅股份，超過３２億銀。不過，佢同工行（０１３９８）一樣，都冇被街坊頭痕所拖累，建行臨近尾市仲突然走高，兩者最後升１至２巴仙。　　另一邊廂，大和預料有賭牌不獲續期嘅風險正在加大，所以對馬交賭業抱住審慎嘅睇法。一班賭仔即刻受壓，大阿哥銀娛（０００２７）逆市碌低逾１巴仙、街坊金沙（０１９２８）跌到去２８蚊水平有支持，尾市拗番上去，跌低ＤＤ收２８﹒８５銀。新濠博亞（０６８８３）就表現最差，急跌咗逾３巴仙收５０﹒３銀。

＊百信急彈跳有貨哈哈笑，廣發與華泰今天同觸礁＊

　　今個月上場嘅半新丁兩邊走，百信藥業（００５７４）第一日上場已經高過招股價約８巴仙，今日再接再厲，再爆升大拿拿５５巴仙，收報２﹒２銀，仲未放嘅缸友，帳面已經賺近兩千蚊喇！　　另一方面，ＩＰＯ招股時熱爆嘅廣發（０１７７６）同埋華泰六八八六（０６８８６），就止唔到瀉；無計啦，呢期Ａ仔要去槓桿，加上上禮拜五（１９日）Ａ仔場跌到阿媽都唔認得，券商股表現唔掂都好合理。呢兩隻半新丁分別再挫３巴仙及４巴仙，雙雙創過新低２０﹒２銀同埋２２﹒３５銀。特別係華泰六八八六，上星期已經跌穿２４﹒８銀招股價，而家仲每下愈況，有貨缸友真係心傷透了…。　　半新丁藍戰士長實地產（０１１１３）又腳仔軟，唔見逾２巴仙，收報６５銀。即使超人增持都好，呢排都唔上唔落，睇嚟個市未好番，都難有超色了！

＊中車來入主７３６急插，瑞信升目標西部再踢上＊

　　中國置業（００７３６）今日復賽都跟升彈高過一陣，不過突然無晒力，埋單仲急瀉逾２４巴仙收１﹒８２銀。皆因公司宣布落實配新股畀中車（０１７６６），ｓｉｚｅ有成６５億股，佔公司擴大後股本嘅六成幾，每股作價０﹒１銀。個價低成咁，難怪股價會被質低啦，計埋今日，公仔圖已經出現四連陰，差唔多打回原形，而入主佢嘅中車就爬升近２巴仙。　　西部水泥（０２２３３）同樣畀國企安徽海螺（００９１４）睇中後，瑞信提升１倍目標價至２﹒０６銀，仲將級由「中性」升到「優於大市」，股價即急飛１１巴仙收１﹒６８，而安徽海螺都踢高５巴仙，報２９﹒６５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇