《小傳日記》魚缸對神州經濟似乎有啲擔憂，今日Ａ場繼續行落，收市跌１﹒７巴仙，去到３６６３，唔見６２點。有缸友擔心，嚟緊星期四（３０日）唔單止美ＦＯＭＣ公布議息結果同聲明，更加係新加坡Ａ５０期指結算，同時亦係香江期指結算嘅日子，有人擔心到時阿爺同世界投資者會嚟一場官鱷決戰，戰火會波及香江呢邊，到時又大上大落。　　其實今日都已經應驗咗！今朝曾經最高踢上５９５點，之後升幅收窄晒，最終只係飛起１５１點或０﹒６巴仙，報２４５０３。成交就有１１５３億銀，同噚日（２７日）差唔多。　　Ａ仔唔掂，國貨佬嗰邊就調轉而行，碌低０﹒５巴仙或５７點，報１１１７３。

＊多事的周四令人甚煩憂，恆指輕踢上國貨續低收＊

　　噚晚油價觸及四個月低點，因為花旗國上星期原油鑽井平台增加２１座，增幅係逾一年最大，顯示原油生產回升。但油股今日反手玩轉急反彈，中海油（００８８３）大升３巴仙；中石油（００８５７）亦踢高２巴仙；中石化（００３８６）亦有唔夠１巴仙進帳。　　東航（００６７０）配股畀花旗國達美航空，籌成３５億左右，而且係溢價近９巴仙配股添，瑞銀話反映外資睇好祖國鐵鳥業先肯溢價入股，畀東航「他屐」５﹒８５銀，仲估南航（０１０５５）都可能會成為投資目標，鐵鳥呢期啲業績又真係幾好嘅，但今日東航仍然踢低４巴仙，報６﹒６銀。另外兩隻鐵鳥南航同國泰（００２９３）分別碌低１巴仙同唔夠１巴仙，國航（００７５３）仲係停緊機。

＊鑽井急急增油價將下沉？油王與鐵鳥反其道而行＊

　　今日港交所（００３８８）一開市就遭殃，被人質落２個巴仙之後，隨魚缸一齊華麗轉身，主動買盤接近六成，股價反彈近１巴仙，報２１１﹒２銀。　　　滬深兩融餘額再跌２７８億人仔，投資熱情好似有所減弱；不過呢，就到業績期，券商佬陸續公開佢地上半年亮麗嘅成績表。就好似華泰六八八六（０６８８６）咁，上半年淨利就按年大升３倍幾，達到６７億人仔，總收入係１４６億人仔，升２倍幾，認真強勁。不過，經過７月風暴大家都唔敢睇好Ａ仔場同券商股喇，股價今日仍然未走出低谷，全日跌逾１巴仙，報１６﹒１４銀。　　其他街坊好似廣發（０１７７６）同中國光大（００１６５）都唔好彩，全日分別唔見近４巴仙同６巴仙，報１４﹒３２銀同１８﹒３銀。不過中國銀河（０６８８１）只跌０﹒６％，算係執身彩。

＊港所與券商今天同閉翳，友邦成績靚終見好氣勢＊

　　今日好多藍戰士都表現好好，友邦（０１２９９）上星期五（２４日）派成績表，成績係見得下人，按年多賺四成，但適逢跌市，搞到派成績表後雖然有大行唱好但股價仍然係向下，結果今日個市好番少少之下友邦即刻升番２﹒７巴仙，報５０﹒３５銀，係第二叻藍戰士。　　祖國移動（００９４１）亦都見番啲生氣，今日彈高１巴仙，報９７﹒７５銀，收復２０天線（９７﹒５１５銀）同埋２５０天線（９７﹒０１銀）。大笨象（００００５）今日雖然反彈，亦都踢高２巴仙，但２０天線（６９﹒０９３銀）見阻力，收報６８﹒８５銀。　　ＱＱ（００７００）亦幾靚仔，踢高唔夠１巴仙，收報１４６﹒５銀。

＊大行來唱好國美跳隻舞，銀仕來惠陶開心高高高＊

　　恆大地產（０３３３３）今日又有「國家隊」出場撐場，查實噚日佢地公司有回購，回購咗１﹒７億股，回購價最高仲去到５﹒３６銀。今日又出現大買盤，股價全日就有逾５巴仙落袋，報５﹒３２銀。　　國美（００４９３）就被瑞銀同花旗唱好，前者維持買入評級，後者睇公司睇到２﹒６銀，股價今日反彈逾３巴仙，報１﹒３１銀。　　百麗（０１８８０）就宣布，話次財季銷售暫時較上季同中期為差，不過就無意思去關店同埋減價，股價今日踢高近２巴仙，報８﹒２３銀。　　呢個咁難玩嘅市，仲有啲神股跌極都跌唔落去，好似銀仕來（０１６１６）咁，三連升經飛起咗逾三成，今日再飆兩成幾，去到１﹒３６銀，至於惠陶（０８２３８），全日飛起逾２４巴仙，成為升幅最勁個股！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情