《小傳日記》本以為新冠肺炎疫情「柳暗花明」慢慢退燒，點知而家係「死多兩錢」，係泡菜國同櫻花國嘅感染人數都逐步擴大，影響咗亞洲「孖屐」嘅氣氛，魚缸呢邊都慘慘豬，今早（２４日）低開二百幾點，失守百天線（２７２１６點）之後就跌幅一路擴大，大隻佬全部被掟貨，令到「孖屐」跌幅一路擴大，而且一度跌近五百點，尾市都係返魂乏術，收報２６８２０點，跌４８７點或近２巴仙，主板成交１２４１﹒３３億銀升近兩成四。國企指數報１０５６８點，跌２２２點或逾２巴仙。　　內地Ａ場今日方向互走，上證收報３０３１點，跌８點深證收報１１７７２點，升１４２點或逾１巴仙。兩市合共成交１２２２０﹒５９億人仔。　　外圍股市咁差，大隻藍戰士今日無走雞下潛，大象（００００５）跌唔夠半巴仙，報５６﹒５銀；生發發（００３８８）挫近３巴仙，報２６０﹒８銀；ＱＱ（００７００）跪低近３巴仙，報３９０﹒４銀；中移動（００９４１）跌近１巴仙，報６５﹒４５銀；ＡＩＡ（０１２９９）瀉逾２巴仙，報７７﹒３５銀。

＊國際油價回三桶油受罪，避險情緒強金佬人人搶＊

　　似乎大家都重申審視疫情對「孖屐」嘅影響，係病例日增情況下，將會拖累原油需求．直接打擊「三桶油」表現。中石油（００８５７）瀉近５巴仙，報３﹒２２銀；中海油（００８８３）挫近４巴仙，報１１﹒７４銀；中石化（００３８６）跌逾２巴仙，報４﹒１２銀；中海油服（０２８８３）插近半成，報１１﹒５銀；中石化煉化（０２３８６）跪低逾３巴仙，報４﹒０１銀。　　疫情觸發大家避險需求加劇，連大行都睇高金價可以突破１６５０甚至１７００美金，金佬今日梗係金光閃閃啦！招金礦業（０１８１８）撐起近３巴仙，報９﹒７７銀；山東黃金（０１７８７）飆逾６巴仙，報２１﹒４銀；神州黃金（０２０９９）飛起逾８巴仙，報６﹒７８銀；壇金礦業（００６２１）飆逾半成，報０﹒０３８銀；靈寶黃金（０３３３０）升近４巴仙，報１﹒３７銀。

＊舜宇入國指股價跌未止，肺炎確診增濠賭股價崩＊

　　恆生指數公司上個禮拜五（２１日）收市後公布季度檢討結果，恆指成分股無變動，而國企指數成分股將加入舜宇光學（０２３８２）同埋海螺創業（００５８６），剔除人民保險（０１３３９）及神州中車（０１７６６）。雖然被國企加入成分股，不過睇嚟大家都唔太捧場，舜宇潛水近１個巴仙，報１２８銀，海螺創業只係微升一格，報３７﹒４５銀；而被踢走嘅人保同堆中車更加雙雙插水約３巴仙，分別報２﹒８４銀及５﹒１２銀。　　櫻花國同泡菜國肺炎確診人數呢幾日都爆升，「孖屐」繼續擔心疫情會進一步擴散，搞到人心惶惶，濠賭佬都唔例外，今日隨市走低。上星期先公布業績嘅金沙中國（０１９２８）雖然舊年盈利升８巴仙，但股價仍然潛水逾１巴仙，報３８﹒１銀；永利馬交（０１１２８）收跌２巴仙，報１６﹒６８銀；銀娛（０００２７）跌到「攤攤腰」，跌近４巴仙，報５３﹒９銀；新濠國際（００２００）潛逾２巴仙，報１７﹒０２銀；澳博（００８８０）挫２個半巴仙，報８﹒９６銀；美高梅（０２２８２）跪低逾３巴仙，報１１﹒０８銀。

＊大行唔睇好體品升唔到，５Ｇ要復工股價向上衝＊

　　最近神州疫情對體品市場造成好大打擊，高盛就發表報告話，因為近期銷售跌咗唔少，加埋經營去槓桿嘅毛利壓力，將體育用品股今年盈利預測下調２１至６５巴仙。但就維持李寧、安踏、寶勝及滔博「買入」評級，普遍降低個「他屐」價。安踏（０２０２０）蒸發半成，報６６﹒２銀；「體操王子」李寧（０２３３１）碌低近４巴仙，報２２﹒２銀；特步（０１３６８）軟腳４巴仙，報３﹒３銀。公有自己有三成門店復工嘅中動向（０３８１８）唔見迎４巴仙，報０﹒７９銀；滔搏（０６１１０）跌低近３巴仙，報１０﹒１８銀。　　５Ｇ佬今日就有運行啦！工信部日前開咗個會議，強調要加快推進５Ｇ發展、做好信息通信業復工復產工作。聽到神州要加快５Ｇ商用，成班５Ｇ佬都開心到彈起，中興（００７６３）鏟高近一成，報３４﹒９５銀；鐵塔（００７８８）抽高近７巴仙，報１﹒９６銀。不過聯想集團（００９９２）先升後跣低逾１巴仙，報５﹒４９銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動