12/12/2023 16:29
《開市Good Morning》熊麗萍明講內地經濟、鋰電行情
《開市Good Morning》正值政策真空期,香江魚缸今日最多彈到200點樓上,不過高位僅剛掂16400點,收市升幅仲縮返晒得173點,收報16374點,成交866億銀無睇頭。據報神州中央經濟工作會議琴日已經召開,可能今日就開完會。神州經濟數據愈差,理論上阿爺在政策出台上會加多兩錢肉緊;但而家孖屐期望咁大,若最終無實質政策新意,反成進一步拖累AH股元兇?路透引述消息人士指,神州出年經濟增長目標維持半成,即係同今年預測無分別;呢個預測會否過分保守?出年達標機會高唔高?仲有星期五(15日)公布嘅神州三頭馬車數據,係咪都一併難睇好? 阿爺對網上平台嘅監管無停過!網信辦公布,即日開展為期一個月嘅專項行動,特別針對散布假消息、影片不當行為及錯誤觀念問題。不過通告一出,又唔見相關股升幅縮好多;本身直播帶貨對谷內需都有好大貢獻,今次出通告係象徵意義大過實際作用?本身12月都唔係直播帶貨旺季,對行業而言影響有限?電商消費近年頻頻出現轉變同革新,昔日「頭部主播」銷售情況有所冷卻,反而「店播」喺今年「雙十一」冒起,未來直播帶貨嘅重心將傾向「店播」? 神州碳酸鋰期貨一個星期內再度跌停!鋰電雙雄贛鋒鋰業(01772)同天齊鋰業(09696)齊受壓,分別逆市跌逾3巴仙及2巴仙。鋰電供應過剩問題砸出年仍難解決?變相業務範疇較廣嘅贛鋒鋰業風險較低?行業弱勢恐維持年計? 聽日(13日)《開市Good Morning》搵嚟資深財經分析師熊麗萍,同大家分析上述股份、大市走勢,同埋當日嘅焦點股同神州通脹數據!歡迎大家提問投資及其他股票問題。記得準時8:55am,昅實《經濟通》NewsTV直播節目--《開市Good Morning》喇!或者click入嚟https:╱╱www﹒youtube﹒com╱watch?v=v2uizny42cw打個卡先又得!!
WoW WoW星期三:健康網購產品低至$99 (只限今天)► 火速行動