《小傳日記》仲有１﹒５個交易日，魚缸將會一連放假四天，農曆新年齊齊過大年。雖然節日氣氛愈嚟愈濃厚，加上港股通今日（１３日）開始暫停，即係無北水支持下，但好友今日都無令大家失望！　　今朝香江魚缸開市跟外圍跳起３９０點後，股王ＱＱ（００７００）、平保（０２３１８）等重磅藍戰發威，帶動大市一口氣爆升最多７０９點報３０１６９。不過，下半場力氣唔係太夠，恆指最終升幅縮咗水得番３７９點落袋，報２９８３９，再一次失守三萬關。ＱＱ同平保都頂得住，踢起超過３巴仙，分別收報４２２﹒４銀及８２﹒３５銀。　　至於Ａ場個邊，今日表現就好番Ｄ，收市有１巴仙進帳報３１８５；國指都收漲１０４點報１２００４。但魚缸成交又靜咗番ＤＤ，約有１２８８億銀。

＊新增貸款勁內銀好高興，保費唔省鏡壽仔跌到驚＊

　　祖國１月新增人幣貸款２﹒９萬億人仔，唔單止高於預期，仲創埋歷史新高。瑞銀即刻走出嚟唱好，將工行（０１３９８）目標價由７﹒２銀大升至９﹒２銀，維持買入評級，有Ｄ缸友都跟住入貨，但埋單只踢起逾１巴仙報６﹒５５銀；中行（０３９８８）都好叻，跳起近２巴仙收報４﹒２４銀；招行（０３９６８）都唔錯，有近２巴仙進帳收３２﹒９銀。其他街坊表現就一般，只係輕輕向前行。　　祖國保險佬個別發展，昔日大阿哥國壽（０２６２８）１月原保費收入按年跌２１巴仙，有貨缸友都好失望決定走人。已經連跌六日嘅國壽全日都無厘神氣，又唔見近１巴仙收２２﹒７５銀，七個交易日累計唔見逾１４巴仙。相反，平保今日就領漲，衝前近４巴仙收８２﹒３５銀。

＊碧桂園盈喜街坊同飛起，旭輝入摩指好友數銀紙＊

　　碧桂園（０２００７）發盈喜，預料去年多賺逾九成，但係股價升完又回軟返，今日靠穩報１３﹒１４銀。另外，上海１月個人房貸增量下降，新年前磚頭孖屐可能淡靜Ｄ，但無阻神州磚頭向上，潤地（０１１０９）、恆大（０３３３３）分別彈起近３巴仙至４巴仙，報２８﹒４５銀、２２﹒１銀。　　ＭＳＣＩ公布季檢結果，將旭輝（００８８４）納入ＭＳＣＩ環球標準指數系列入面神州指數，剔出神州小型股指數，２月２８日收市後就會生效，消息推動旭輝再飛起近６巴仙，報６﹒０５銀。

＊四大行畀讚舜宇急急彈，瑞聲氣勢強丘鈦亦上揚＊

　　手機一哥舜宇（０２３８２）近日喜事連連，事關佢噚日收市後，就發盈喜，受惠手機鏡頭、車載鏡頭等出貨量強勁，因此仲預期去年溢利大幅剷高逾１﹒２倍添呀，叻！而四家大行仲連環送上祝福添呀，分別係瑞信、野村、大和同埋麥格理，其中以麥格理畀最牛價２２０銀呀，足足比噚日收市價１１２﹒６銀高出約９５巴仙架！最後佢完場時仍爆升約６巴仙，報１１９銀，日內仲曾經喺１２４﹒４銀高位插旗添呀，仲係全日表現最好嘅藍戰士添呀，唔知佢喺農曆新年假期前仲可否繼續保持上升嘅勢頭呢？　　至於街坊瑞聲（０２０１８），今日都唔輸蝕，仲畀花旗唱好，續予「掃貨」評級，「他屐」就畀１８０銀，仲話瑞聲嘅鏡頭業務表現強勁，最終收市時就升咗逾３巴仙，報１４８﹒９銀；丘鈦（０１４７８）都圍埋一齊開Ｐａｒｔｙ呀，全日升咗約１０巴仙，報１０﹒５８銀。

＊賣地俾恆地６８７歡喜，Ａ仔好旺場券商齊歡唱＊

　　海航旗下香江國際建投（００６８７）宣布賣地畀恆地（０００１２），賣嘅正正係２０１６年底高價投得嘅其中兩塊啟德地皮。海航早前都成日傳出資金周轉有問題，今次可以套現到接近１６０億銀，相信都幫到唔少喇。香江國際建投今朝開波曾經衝高近２１巴仙，不過之後就縮哂水，埋單只係踢高７巴仙，報２﹒２６銀。花旗話呢兩塊地皮作價合理，不過估計市場唔會太大反應，果然恆地今日無咩大郁動，只係踏前１巴仙，報４９﹒６銀。　　Ａ仔場曾經重上三千二水平，雖然最後企唔穩，搞到祖州券商佬開完Ｐａｒｔｙ都急急收水，信証（０６０３０）飆過近６巴仙，但最後只係踏前２巴仙，報１７﹒３８銀。街坊廣証（０１７７６）就跳起逾１巴仙，報１４﹒９銀。　　另外，一眾ＥＴＦ都好開心，安碩Ａ５０（０２８２３）曾經逼近１６蚊關口，最終收升逾１巴仙報１５﹒５２銀；南方Ａ５０（０２８２２）就炒上接近２巴仙，報１５﹒９４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇