《古臣周記》狂人特朗普為世界帶來大震盪，港股繼續大上大落格局，連作為重磅股嘅騰訊（００７００）近期經常被壓住，股價喺４００蚊關口震盪；其他藍籌股方面，友邦（０１２９９）、內銀、內房股都無升勢，咁搞法恆指當然都唔會有運行，所以阿臣繼續維持對大市偏淡嘅看法。

＊敘利亞問題難斷尾，大國經濟角力持續＊

　　貿易戰繼續進行，國際關係又因為敘利亞問題而變得緊張起來。敘利亞總統阿薩德政權因為早前涉動用化學武器攻擊，惹起特朗普怒火，美、英、法連成一線空襲敘利亞，雖然目標係瞄準化學武器設施，又完全避開俄羅斯基地，避免強權間直接衝突。但係敘利亞對於俄羅斯有極重要戰略地位，所以俄羅斯都對英美法三軍空空襲表示不滿，暫時全世界最怕嘅係戰事局面會進一步升溫。　　其實，敘利亞事件早於幾年前已經發生，政府軍同反對派衝突問題一直未得到解決好難斷尾。奧巴馬政府時期，都發生過希望利用空襲去教訓政府軍使用化武，而最終西方國家都無將敘利亞嘅問題提升到全面戰爭層面。不過，美國同俄羅斯喺敘利亞度角力，遲吓兩國互相出招制裁對方，都係容易預見得到。

＊孖屐轉投消費股，六福突破百天線買入＊

　　孖屐之前就瘋狂炒起晒Ｄ藥股，而石四藥（０２００５）呢類股份亦出咗季績為缸友帶來一個交代，孖屐開始轉而炒起消費股，好似安踏（０２０２０）、李寧（０２３３１）、莎莎（００１７８）等都開始展開明確嘅升浪。不過消費股中六福（００５９０）起步就相對慢慢咗少少。　　孖屐睇中消費股，都係博通脹升溫。現時美國處於加息周期，環球經濟又保持增長，但全世界中央銀行加息速度又唔會快過通脹，所以通脹只會有增無減。更加莫講香港呢邊仲係低息環境但通脹就持續，消費股當然最受惠。呢排消費股抗跌力都強勁，所以阿臣噚日（１７日）等六福突破百天線（２９﹒８７７元）後買入一手，每股成本３０蚊，希望可以喺嚟緊呢季有所斬獲。

　　表列截至４月１８日（１１：１５ａｍ止）投資組合表現：

　　股份　　　　　股數　　　　平均買入價　　　　　　現價　　　　　　　總值　　－－－－－－－－－－－－－－－－－－－－－－－－－－－－－－－－－－－－－－－－　　港股：　　騰訊　　　　　１００股　　３６２﹒００元　　３９７﹒６０元　　　　３９７６０元　　六福　　　　１０００股　　　３０﹒００元　　　３１﹒００元　　　　３１０００元　　－－－－－－－－－－－－－－－－－－－－－－－－－－－－－－－－－－－－－－－－

　　一周買入股份　　－－－－－－－－－－－－－－－－－－－－－－－－－－－－－－－－－－－－－－－－　　股份　　　　　　每股作價　　　數量　　　計及手續費後金額（元）　　　盈╱虧（元）　　　　　　　　　　　　　　　　　　　　　　　　　　　　　　　　　　　（不計手續費）　　－－－－－－－－－－－－－－－－－－－－－－－－－－－－－－－－－－－－－－－－　　六福　　　　　　　３０元　　１０００股　　　３００８７﹒３１　　　　　－－　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　　　　　　：　　７０７６０元　　剩餘現金　　　　　　：　　８７４３６元　　組合淨值　　　　　　：　１５８１９６元

　　組合本月收益表現：　＋　０﹒９％（截至上月底止組合淨值：１５６８２４元）　　組合累計收益表現：　＋５０﹒７％（本金１０５０００元計）（２０１６年８月開倉）

　　＊數據截至今日１１：１５ａｍ

全新節目《說說心理話》青少年不可以戀愛！？真實個案講述驚心動魄經歷► 即睇