《小傳日記》美斯ｎｏ　ｓｈｏｗ一事再有進展，Ｔａｔｌｅｒ宣布經Ｋｌｏｏｋ買飛市民可以退半數，今日起會收到由Ｋｌｏｏｋ寄出ｅｍａｉｌ，要喺４月１２號前回覆先確認回水，唔係就無。使咗幾千銀先可以退一半，反而東方甄選（０１７９７）仲「格局大」，如果證實貨不對辦承諾賠三！　　東方甄選無見一排又踩到地雷，事緣央視每年３月１５都會搞場維護消費者權益嘅節目，今年都查到安徽阜陽有三間預製菜廠，用咗未經嚴格處理嘅「槽頭肉」嚟整梅菜扣肉包，而槽頭肉即係香港叫嘅豬下青，通常附近都帶有好多淋巴腺，要切走先可以食，但就算切走咗，豬下青都係下欄嘅肉，據講幾蚊人仔就有一大斤，處理唔乾淨食咗對身體都唔好。所以央視公布之後，當地監管部門已去到廠房查處。　　咁啱上年東方甄選就有賣過涉事廠房嘅扣肉包，今朝已經宣布會墊錢賠償，到下晝就再宣布更加多賠償方案。東方甄選就話，去到上年１０月２９已經無賣出事嘅「御徽緣梅菜扣肉」，自己係帶貨嘅代售商，事後已經查詢商家同生產廠家，兩邊都話隻預製菜包係無用到出事嘅槽頭肉，仲話咗會盡快提供相關證據。　　雖然有可能啲預製菜包真係無用下欄肉，但係東方甄選話出於「對食品安全事件零容忍」嘅態度，決定係咪都先行墊錢退款，如果廠商證據證明唔到真係無用到違規槽頭肉，仲會再賠多三倍，總共就係買一賠四！　　經過董宇輝風波之後東方甄選見過鬼都怕黑，今次對關公嘅反應都快好多，雖然梅菜扣肉包同美斯飛價錢差天共地，但係無事都退全數，有事仲賠三，作為消費者條氣都順啲。其實今次東方甄選都無得反應慢，因為個節目係央視播，唔認數一定仲大鑊，所以賠錢一定有幾快得幾快。而且，東方甄選可以反應咁快，好有可能係同廠商打咗合同有咩事係要三倍賠償損失，先可以大大聲話買一賠四。所以，搞大壇嘢一定要砌好合同，如果唔係就要賠凸，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】辭任終院法官撰文指本港法治受干預，政府反駁強調不受政治壓力，你是否支持政府回應？► 立即投票