《魚缸博客》話說近期博客留意到隻股叫企展控股（１８０８），２００７年上市，公司業務主要從事提供綜合商業軟件方案及買賣上市證券，不過軟件方案我就無咩點聽聞呢間公司有出名，但公司炒股就好似有一手。　　睇返公司近呢三個月炒股紀錄，公司好似主力炒美股為主，近期見佢炒ＮＶＤＡ為主，仲有買過ＲＩＯＴ、波音同特斯拉，睇來炒房個位都幾緊貼市場走勢。　　最犀利係，公司早前公布盈喜，預計全年虧轉盈賺最多４００萬，如果單單靠炒ＮＶＤＡ，確實都幾犀利下，公司注碼都係千萬上落，你當佢係一隻基金都得，係一隻買美股嘅基金。　　睇返圖表走勢，公司股價從２月起開始有資金流入，每日成交都係一百幾十萬，唔算多又唔算少，博客無做太多調查，未知係咪「微信女」推介股份；但如果純粹炒交投炒走勢，呢隻股要炒上都唔算太難，特別係而家炒高左可能再夾上去。　　股價歷史新高係２﹒６咁上下，大家如果想搭順風車可以玩小小，不過記得小注碼完下就算，畢竟呢類股成交少，買賣價差大，唔係一般執錢咁執，要長期睇實！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】的士業「放蛇」舉報Uber，政府應否將網約車合法化？你是否支持該類自行「放蛇」行為？► 立即投票