《小傳日記》隔晚（１１日）花旗國魚缸走勢靠穩，收市都係窄幅上落，但就破咗頂，因為大家都等緊花旗國經濟數據出爐，同埋侵侵（特朗普）及鮑威爾講話，今朝魚缸依然可以高開１３７點，但都係喺二萬七附近上上落落，主要因為香江政治因素不穩，今日多區繼續爆發示威活動，令到缸友們落場都比較審慎。　　不過，神州十年期國債孳息反彈，刺激內銀佬造好，加上ＱＱ（００７００）聽日收市後就放榜，績前都有資金追捧，魚缸午後收復失地，最多反彈１５０點，高見２７０７６點，最終埋單企穩二萬七，收報２７０６５點，升破埋廿天（２７０２６點）同百天線（２６９９６點），升１３８點或逾半巴仙。主板成交６９１﹒２２億銀，按日跌兩成一。國貨收報１０６９１點，升７７點或近１巴仙。　　內地Ａ場都係牛皮靠穩，上證一度穿咗二千九，埋單報２９１４點，升４點或唔夠半巴仙；深證收報９６７０點，跌１０點或唔夠半巴仙。　　大隻藍戰士方面，大象（００００５）微升唔夠半巴仙，報５９﹒０５銀；生發發（００３８８）跳起近半巴仙，報２４７﹒４銀；ＱＱ炒高逾２巴仙，報３３０﹒２銀；中移動（００９４１）無升跌，報６２﹒７５銀；ＡＩＡ（０１２９９）微漲近１巴仙，報８０﹒３５銀。　　中信股份（００２６７）全日表現造好，主要因為公司轉讓中信戴卡五成七股份套現，刺激股價高收逾３巴仙，為本日最好藍戰士。潤啤（００２９１）勁彈超過半成，報４３﹒７５銀，係表現最好嘅國貨佬！

＊示威未停止磚頭難驅使，商場無門開房託好悲哀＊

　　連續兩日各區都開曬花，磚頭佬開幾多新盤都無人買啦，今日大部分都係微潛，九倉置業（０１９９７）潛逾１巴仙，報４３﹒８５銀；恆地（０００１２）跌近半巴仙，報３８﹒３５銀；新世界（０００１７）同樣跪低唔夠半巴仙，報１１蚊；信置（０００８３）潛逾半巴仙，報１１﹒８２銀；長實（０１１１３）跌唔夠巴仙，報５３﹒７０銀。　　示威活動都令到好多商場無門開或者開唔到門，連返工都有障礙，一眾房託又再插水，領展（００８２３）潛近１巴仙，報８２﹒３銀；陽光房地產（００４３５）瀉逾２巴仙，報５﹒２８銀；置富（００７７８）跌逾半巴仙，報９﹒１８銀；冠君（０２７７８）唔見逾１巴仙，報５﹒０７銀。泓富（００８０８）逆市升近半巴仙，報３﹒０２銀。

＊無懼負評多馬交佬高歌，短暫回下氣物管佬有戲＊　　　馬交佬噚日跟孖屐急挫，今日普遍都彈番起身。大行富瑞發表報告，唱淡馬交佬，預料今個月賭收會繼續下滑，而且跌幅仲可能係今年最大添，達到８至１２巴仙，但仍然無阻永利馬交（０１１２８）反彈逾２巴仙，報１７﹒３４銀，終止四連跌。美高梅（０２２８２）亦追住升逾２巴仙，報１２﹒４４銀。銀娛（０００２７）起哄逾１巴仙，報５３﹒７銀；新濠（００２００）走高逾２巴仙，報１９﹒９６銀；澳博（００８８０）升近１巴仙，報８﹒３７銀；金沙（０１９２８）踢高逾１巴仙，報３９﹒８銀。　　物管佬噚日頭耷耷，但今日表現醒神，再次喺孖屐前景唔太明朗嘅情況下急漲，仲創埋上市新高添！新城悅（０１７５５）狂飆一成一，報１１﹒１８銀兼破頂；藍光嘉寶（０２６０６）勁彈逾９巴仙，報４７﹒３銀，同樣破埋頂；中海物業（０２６６９）亦走高逾半成，報４﹒８９銀創新高；雅生活服務（０３３１９）急漲逾半成，報２５﹒９５銀；永升生活服務（０１９９５）反彈近半成，報４﹒８１銀；奧園健康（０３６６２）漲逾半成，報６﹒４銀。

＊藥佬無力上中生跌最傷，金價向下走金佬倍憂愁＊

　　藥佬今日繼續無運行，雖然中生製藥（０１１７７）近排成為國貨佬之中嘅「新貴」，不過就唔喺太受缸友歡迎，連續三日都仆低，今日埋單就唔見近２巴仙，報１１﹒２８銀，仲喺表現最差嘅藍戰士！石藥（０１０９３）蒸發近半巴仙，報２０﹒９５銀。白雲山（００８７４）軟腳半巴仙，報２５﹒２銀。百濟神州（０６１６０）陣間就放榜，唔見近２巴仙，報１１４﹒７銀。復星醫藥（０２１９６）無變動，報２３﹒３銀。　　缸友都仲等緊中美幾時會簽訂貿易協議，搞到用嚟避險嘅黃金價格喺噚日跌至逾三個月低位。金佬都齊齊碌落山，其中，招金（０１８１８）仆低逾４巴仙，報８﹒１８銀。紫金（０２８９９）趴低近２巴仙，報２﹒９銀。山東黃金（０１７８７）滑逾４巴仙，報１６銀。神州黃金（０２０９９）剎車逾１巴仙，報５﹒９２銀。不過，恆興黃金（０２３０３）就踢高逾２巴仙，報４﹒２９銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情