• 恒指
  • 17,651
  • +367
  •  大市成交 1,572億
  • 期指(夜)
  • 17,621
  • -59
  • 低水30
  • 國指
  • 6,270
  • +149
  • 紅籌
  • 3,673
  • +67
  • 科指
  • 3,718
  • +164
  • 上證
  • 3,089
  • +36
  •  成交 4,842億
05/09/2014 17:44

《小傳日記》歐洲突放水,A仔多人追;香江再回氣,高位有點醉!

  《小傳日記》歐洲央行噚晚(4日)出乎意料宣布減息至紀錄低位,都係為咗脫離通縮危機同埋打救經濟。過往聽到「放水」兩個字,缸友都唔理三七廿一都當係天大好消息炒,不過今時今日,好明顯呢個魔法已經唔係咁Work。噚晚德法股市升逾1%,但花旗國魚缸就無咩點郁,三大指數仲輕輕向下碌;香江魚缸今日(5日)繼續喺高位調整,亦都好似無事發生過一樣,恆指全日回調57點報25240,但成交都唔少,都有差唔多840億銀。  之不過,A仔場好叻仔,噚日上番二千三之後,今日再接再厲,衝高近1巴仙收2326點;但就帶挈唔到國貨佬再威多次,國指完場都唔見18點收11368。  仲有溫馨提示,下星期一(8日)A仔場要慶賀中秋,休市一天,而香江就星期二(9日)先停賽。   *A仔場當旺ETF踢高,大象新世界今天也風騷*    講番魚缸入面,A仔場咁旺,A50(02823)同南方A50(02822)梗係多人吼,好自然就逆市踢高1巴仙啦。不過勢估唔到,大象(00005)今日竟然係呢個時候追落後,曾經彈高逾1巴仙至84﹒1銀,雖然最後得番83﹒6銀,但都算唔錯了。今日收市之後,大象喺大隻佬指數嘅權重影響力就會正式被降低,但可能缸友一早消化咗呢個消息,反而關注市傳佢下星期就會發50億美金或然債,以補充資本充足率嘅傳聞,決定入市支持下。  除此之外,新世界發展(00017)表現都好好,跑贏其他香江地主,皆因瑞銀睇好佢個旗艦天后豪宅項目,決定升目標價至11﹒67銀。有大行護航,股價成功升逾2巴仙收10﹒32銀。仲有新地(00016)本來走勢都唔錯,今朝升到去120﹒2銀,不過收市前突然跌番落嚟,收118﹒4銀完場。

*QQ遇阻力愛將軟無力,有個靚媽媽浪潮顯實力*

  「股王」QQ(00700)呢排橫行咗一陣子,一心諗住試衝130銀關,點知唔夠力,搞到要倒轉頭跌番近1巴仙收128﹒3銀。睇嚟要衝破呢個強大阻力位,QQ都要儲多少少電先得。不過講到弱勢,「愛將」金山軟件(03888)呢幾個月都真係幾黑仔,自從喺4月份創新高見逾33銀之後便一沉不起,今日仲要無辜唔見2﹒5巴仙收21﹒2銀,下一站隨時20蚊見都唔出奇。     嗰邊廂就陰沉沉,呢邊廂就喜洋洋,金蝶(00268)宣布同浪潮集團,即係浪潮國際(00596)嘅媽咪,合作開拓國產主機系統,一於有生意齊齊搵。結果,金蝶逆市收升逾2巴仙報2﹒68銀;而浪潮國際囝憑母貴,一度急升15巴仙見2﹒23銀,不過最後就只得近5巴仙進帳,報2﹒03銀。

*南北車復牌先升後回吐,中信臨散場交投忽大增*

  唔係只得浪潮國際「有頭威,無尾陣」,今朝復牌嘅南車(01766)同北車(06199)亦澄清咗合併傳聞,話無收到阿爺通知,而自己都無上報過任何方案,但缸友似乎唔多信,諗住「空穴來風,未必無因」,照樣衝入市博爆升。點知,之後有大行話合併機會真係唔大,上咗車嘅缸友又開始驚驚地,又決定掟貨走人先,最終南車要倒跌近0﹒6巴仙收7﹒1銀,而北車就升唔夠1巴仙收6﹒87銀。至於完全唔關佢事嘅南車時代(03898)復賽後又係一升即跌,跌得仲勁過兩位主角,完場碌低逾2巴仙收29﹒3銀,認真無辜。  另外,要提一提中信股份(00267),自從星期一(1日)改名之後交投明顯多咗,今日收市前幾分鐘,成交突然急增至近20億,係第三多成交嘅股份,收市仲唔見逾2巴仙報14﹒88銀,走勢古古怪怪,有貨缸友要小心啦!

*宏橋搞批盪粉絲即掟貨,721易主爆升來慶祝*

  中國宏橋(01378)又係今日復賽股份之一,公司宣布折讓逾9巴仙,先舊後新配股,籌近17億銀還債,兼儲定彈藥將來隨時買嘢。不過老老實實,突然攤大手板抽水還債,又唔係有咩新發展,粉絲就當然唔HAPPY啦,一於掟貨說再見,宏橋收市只得6﹒36銀唔見咗近7巴仙,一口氣跌穿十天、廿天兼五十天線。  想得到粉絲支持,就梗係要有消息先得啦!中國金融國際(00721)就決定換大股東,折讓67巴仙引入喺祖國有豐富經驗嘅同業外聯發掌舵。搵到好人家,粉絲梗係舉腳贊成,中國金融收市就以逾2億銀大成交爆升三成,收0﹒78銀。假期愉快,請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性       本文只供參考之用,並不構成要約、招攬或邀請、誘使、任何不論種類或形式之       申述或訂立任何建議及推薦,讀者務請運用個人獨立思考能力自行作出投資決定       ,如因相關建議招致損失,概與《經濟通》、編者及作者無涉。

全新節目《說說心理話》青少年不可以戀愛!?真實個案講述驚心動魄經歷► 即睇

備註︰

即時報價更新時間為 26/04/2024 18:00

港股即時基本市場行情由香港交易所提供; 香港交易所指定免費發放即時基本市場行情的網站

股票
即時報價
全文搜索
Search
最近搜看
貨幣攻略
大國博弈
More
Share