《小傳日記》登登登凳！魚缸終於會喺聽日迎來第一批虛擬貨幣現貨ＥＴＦ，係亞洲區第一個市場提供虛擬貨幣現貨ＥＴＦ，美國今年初先啱啱批准現貨ＥＴＦ上市，魚缸時隔三個月多啲就批到現貨ＥＴＦ上市，終於比起其他市場進步，希望真係可以圓到港府提高市場流動性嘅心願啦。　　六隻虛幣現貨ＥＴＦ將會由三間基金公司發行，分別係華夏基金（香港）、嘉實國際、博時國際發行，各自會發行一隻比特幣同以太幣嘅現貨ＥＴＦ，分別係華夏比特幣（０３０４２）、華夏以太幣（０３０４６）、嘉實比特幣（０３４３９）、嘉實以太幣（０３１７９）、博時比特幣（０３００８）同博時以太幣（０３００９）。　　唔同於一般ＥＴＦ，六隻虛幣現貨ＥＴＦ將會１００％直接投資比特幣或者以太幣，買入虛幣現貨ＥＴＦ可以話係直接買咗虛幣，無電子錢包嘅投資者終於可以一嘗炒幣嘅刺激感。不過買得ＥＴＦ就要畀管理費，以全年開支比率計華夏要１﹒９９％，嘉實要１％，相對博時就抵少少，只係０﹒８５％。　　雖然係亞洲區第一個提供虛幣現貨ＥＴＦ嘅市場，但係有意見就覺得，香港對於虛擬資產態度比較保守，所以未必會好似美國推出嗰陣咁豬籠入水。但睇返ＪＰＥＸ案，截至今個月中，涉及案件嘅金額就有成１６億銀，即係都有１６億錢都願意入手虛擬資產，如果而家直頭買ＥＴＦ咁方便，其實都唔難吸引到潛在想投資虛幣嘅錢出嚟。　　但睇返而家比特幣走勢，近呢幾日都真係麻麻，３月至今個月中炒高見７００００美金打上就回落，加上ｈａｌｖｉｎｇ都過埋，要回吐實在係大有藉口。近期頸線位處於６００００美金位置，加上條１００天線已經上緊嚟，可以預計６００００大關將會係關鍵爭持位，入唔入現貨ＥＴＦ就要睇實喇，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》與你分享遭遇欺凌該如何應對　教你兩個方法輕易彈走負面情緒► 即睇