《小傳日記》魚缸４月嚟咗個大翻身，臨到月底係咁升，升咗成１５００點有多，雖然最終收唔到喺１８０００以上，但都收到１７８００附近，月線圖上創咗六個月以來最高收市位。　　今個月都算係全球市場圍繞著資產價格團團轉嘅一個月，本身因為美聯儲局時鴿時鷹，油價金價都有暗湧，到月初以色列忽然空襲伊朗駐敘利亞大使館，令到原本嘅以巴衡突蔓延到產油重國伊朗，令到油價同避險金價飆升，其中金價更加一度過上過２４００美金嘅歷史新高。但因為戰事因素，都令到港股借勢調整。去到月中１９號，喺伊朗中部傳出爆炸聲，據報係以色列針對伊朗反擊嘅導彈回擊，隨後亞洲區股市暴跌，日股一日急瀉千幾點，同台股一齊要跌３％，反而已經好殘嘅魚缸就跌唔多，竟然難得地跑贏亞洲區主要市場。　　而事後都證實魚缸跑贏唔係無原因，就喺亞股震盪嗰個周末，阿爺終於提出五大措施指明支持魚缸，包括一、放寬滬深港通股票ＥＴＦ合資格產品範圍；二、將ＲＥＩＴｓ納入滬深港通；三、支持人仔櫃台納入港股通；四、優化基金互認安排，及五、支持內地行業龍頭企業赴港上市。比起研究八號風球開市，阿爺一句就令魚缸大反彈，上個禮拜開始魚缸有前無後咁升，全個禮拜升足五日，係魚缸久違嘅一次五連陽，果然魚缸就係等緊阿爺嘅救市措施。　　再到今個星期，魚缸進一步挑戰１８０００之後終於要回一回，不過都唔係無好消息，今日魚缸就新出咗六隻虛幣現貨ＥＴＦ，換言之港股就已經可以當係直接買到比特幣！而今日埋單最高成交嘅係華夏比特幣（０３０４２），總共成交３７１６萬銀，六隻合共炒咗８７６１萬銀左右。　　再睇外圍方面，日股跌完輪到日円繼續跌，早兩日仲連５算都穿埋，史無前例咁低令到啱啱呢個周末街頭巷尾都討論係咪係時候再入一入円。總結呢個４月，多得阿爺，魚缸終於升返啲，下個月就要睇呢幾項措施成效點喇，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】辭任終院法官撰文指本港法治受干預，政府反駁強調不受政治壓力，你是否支持政府回應？► 立即投票