《小傳日記》呢排聽缸友講得最多嘅，就係「大牛市喎，你入咗貨未？！」老老實實，望住Ａ場升咗咁多日，破完一關又一關，今日（１７日）又直逼四千三，收升逾２巴仙報４２８７點。香江就繼續喺高位整固緊，好似想等唞夠就再闖二萬八咁樣，如果仲未入貨，都咪話唔心動…　　不過，見到唔少大隻佬都開始無咩力，生發發（００３８８）、祖國錢莊、祖國燕梳等都碌番落去，搞到大市最終倒跌８６點收２７６５３。國指仲叨唔到Ａ場嘅光，散場要急跌１８３點或１﹒２巴仙，報１４５３６，全日主板成交２１４５億銀左右。究竟係跌市嘅序幕，定係大升市前嘅整固呢？！小傳今次都唔係太識睇，只可講句，如果有貨係手，而已經有得賺嘅，就不如袋一半落走人，拎番個本先吧，淨低一半就考吓眼光！

＊破頂後倒跌內銀升勢完？中移加友邦回勇發光芒＊

　　講番Ｄ大隻佬表現先，頭先提過祖國錢莊手拖手碌番落嚟，中行（０３９８８）、建行（００９３９）、工行（０１３９８）今朝再創新高之後，獲利回吐盤就湧晒出嚟，齊齊唔見逾２巴仙，仲順序做咗第一、二、四差表現大隻佬添。　　反而噚日畀人質低嘅祖國移動（００９４１），今日表現回勇，收復番晒失地，收升約２巴仙報１０７﹒７銀，啱啱好上番十天線（約１０７﹒４２銀），為大市貢獻咗４０點。再加埋友邦（０１２９９）都逆市抽升逾２巴仙收５３﹒２５銀，啱啱贏祖國移動一個馬鼻，推高魚缸４１點！如果唔係有呢兩位重磅大隻佬頂住，睇怕好友下星期一想反擊都唔係咁易。

＊中海外衝高中建築叫好，建材及水務一齊高高高＊

　　祖國海外（００６８８）獲野村力撐，話佢有阿媽照顧注入資產後未來收入可以升高兩成咁多，今日埋單升近３巴仙，報２９﹒９５銀，係最威水大隻佬。同系嘅中國建築（０３３１１）就畀匯證推高，升「他屐」到１４﹒９銀，啲資金於事飛晒去幫佢築高個股價，收市行高咗近１２巴仙，報１４﹒５６銀，仲曾經創埋上市新高。有國企阿媽照住，間唔中都炒吓注資概念，爽！　　阿爺重點發展嘅「一帶一路」相關股輪住升。金隅（０２００９）就踢高逾４巴仙報９﹒１銀。中治（０１６１８）、中國建材（０３３２３）分別逆市踢高７巴仙及３巴仙。　　另一班繼續受惠「水十條」出爐嘅強勢股，好似北控水務（００３７１）又彈高近８巴仙，報７﹒１２銀，超過十四年半新高！中國水務（００８５５）又有近５巴仙進帳，又創近七年半高添！

＊南北車強勢囝囝都唔曳，船仔傳整合股價慶烚烚＊

　　火車佬作為今年嘅大主題，缸友有冇坐穩？未落車嘅缸友應該好開心，因為火車佬今日繼續開車喇。南車（０１７６６）、北車（０６１９９）Ａ場果邊連續第５日齊齊漲停板，香江呢邊梗係唔執輸繼續上啦，兩者都踢高約７巴仙。南車時代（０３８９８）都開高咗逾４巴仙，報６７﹒９５銀。　　阿爺方面，就有傳會整合一班央企船仔，四大航運央企包括中國遠洋集團、中國海運集團、中外運長航集團及招商局集團，都榜上有名。今日一班船仔齊齊揚帆出海，廣船（００３１７）駛出６巴仙，街坊中國遠洋（０１９１９）、中海集運（０２８６６）同中海發展（０１１３８）分別浮起７巴仙至近１７巴仙，勁！

＊石藥被減磅股價卻上闖，北辰配Ａ股金海無人沽＊

　　魚缸今朝曇花一現，但有個別股仔就不知幾精彩。睇下成交最勁果隻石藥（０１０９３），雖然畀主要股東賣晒４１巴仙持股，套現近９８億銀，不過股價今日竟然仲有得升，而且仲踢高咗近７巴仙，收報７﹒９９銀，最高仲曾過８﹒５７銀添，成交高達１１２﹒７５億銀！　　呢邊有人減持，果邊就有人增發股份，北辰（００５８８）增發Ａ股，一共有５億幾股，發行價唔低過每股４﹒５１人仔，市場好似好受落，股價又爆起咗５２巴仙，收報３﹒８８銀。　　半新丁佐力小貸（０６８６６）橫行咗一段時間，無晒蟹貨，一啲阻力都無，加埋公司宣布獲准向全國網上零售商貸款，今日就抽升４４巴仙慶祝！　　另一隻愈升愈有嘅仲有金海（００１３９），公司之前供股，今日股價逾８億銀大成交抽升４４巴仙，直入仙境咁滯。　　估唔到喺呢個大牛市時代，今日大約三點鐘左右，彭博終端機竟然全球死機，瑞信、瑞銀等大行都連唔到線，搞到好多ｂａｎｋｅｒ都話睇唔到價，做唔到Ｔｒａｄｅ！究竟發生咩事？彭博發言人就只係話調查緊。好彩唔係發生喺上星期大升市嗰陣，如果唔係後果就不堪設想了。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇