《小傳日記》侵侵又出口術，一轉早前同習大大好Ｆｒｉｅｎｄ嘅講法，話同習大大已經唔似之前咁親密，仲話兩國貿談之路仲有Ｌｏｎｇ　Ｗａｙ　Ｔｏ　Ｇｏ，如果有需要可以向神州額外三千億美金商品加徵關稅。侵侵一開口，搞到道指就算因為上個月零售數據好過「孖屐」預期再破頂見２７３９８，最後都要收跌２３點到２７３３５點；標指全日唔見１０點報３００４點；納指就跌３５點到８２２２點。　　香江升咗五日進帳５０３點之後，今日都要休息吓啦！今朝（１７日）先低開１５５點見２８４６３，隨即失守埋２０天線（約２８４９７點），最多仲跌過２４２點，好彩嘅係Ａ場嗰邊連日下跌之後，今日明顯跌少咗，令到缸友都敢買返啲貨，包括前跌到殘晒嘅吉利（００１７５）同有消息炒吓嘅ＱＱ（００７００）。恆指最終埋單報２８５９３點，跌２６點，全日成交６００﹒２１億銀再減逾８巴仙。國貨就收報１０８４７跌１７點。　　Ａ場繼續腳軟軟，上證收市跌５點，報２９３１點，全日成交１５２１﹒６３億人仔。　　大隻藍戰士表現麻麻，「孖屐」傳ＱＱ有份投資嘅鬥魚會喺花旗國ＩＰＯ上市籌７﹒７５億美金，但消息只刺激ＱＱ今日升６毫子，報３６３﹒２銀。ＡＩＡ（０１２９９）繼續高位整固挨住條十天線（約８５﹒０４銀），全日埋單升１亳子，報８５﹒５銀。大象（００００５）就跌１毫子報６５銀；無咗百威亞太（０１８７６）呢個大客嘅生發發（００３８８），今日回穩，今日無升跌報２７３﹒６銀；神州移動（００９４１）就唔見一格報７０﹒８５銀。

＊華晨獲增持升勢猶未止，消息炒過籠石藥升勢終＊　　　　之前跌到應一應嘅一眾砵砵車，連日都有返捧場客，好似吉利咁今日先畀野村維持「他屐」１６﹒２銀同「買貨」投資評級，連日喺１２銀邊跌定之後，今日彈３巴仙報１２﹒２２銀，仲做埋表現最好藍戰士！之前公布考慮會派特別股息嘅華晨（０１１１４），今日再炒起，加上最新披露股東Ｂａｉｌｌｉｅ　Ｇｉｆｆｏｒｄ上星期五（１２日）增持１７０２萬股，刺激華晨今日再揚升半成，報９﹒３６銀；東風（００４８９）、比亞迪（０１２１１）同長汽（０２３３３）亦分別有逾１巴仙落袋，分別報６﹒８２銀、４８﹒９銀同５﹒８銀。廣汽（０２２３８）就升２巴仙，報８﹒２２銀。　　網傳藥品帶量採購會由部分城市擴展到神州全國，不過２８隻納入嘅藥品就無增加，中標嘅藥佬都由一間去到三間，「孖屐」認為呢個消息將之前嘅「不明朗」因素消化，呢幾日都炒高幾隻醫藥佬，不過話晒都只係「網傳」咋喎！部分醫藥佬都回吐返啲囉，好似石藥（０１０９３）都要跌返逾１巴仙，報１３﹒５銀；藍籌街坊中生製藥（０１１７７）亦跌逾半個巴仙，報８﹒８７銀。之前連續畀大摩、高盛同花旗首予目標嘅焦點新股翰森製藥（０３６９２），今日再畀招商證券首予２５﹒８０銀「他屐」同「買貨」評級，但今日就再走低２巴仙，報２２﹒９５銀。其他同業方面，康哲藥業（００８６７）就升近３巴仙，報７﹒８７銀；國藥（０１０９９）都漲近１巴仙，報２９﹒５５銀；但最叻要數綠葉製藥（０２１８６）今日罕有以大成交抽上６銀關口，袋近６巴仙落袋，報６﹒２２銀，收復埋五十天線（約５﹒９３銀）同百天線（約６﹒１８８銀）。

＊利潤八百億水泥佬得益，中東政局緩油佬見頭暈＊

　　小傳噚日都講水泥行業上半年嘅利潤達到８００億人仔，按年增近兩成，今日部分水泥佬表現繼續唔錯，好似山水水泥（００６９１）咁仲發埋盈喜，預期中期純利將較去年同期大幅增加，全日跳高２巴仙，報３﹒３２銀。中國建材（０３３２３）就踢高３巴仙，報７﹒２７銀，係全日表現最佳國貨佬。海螺水泥（００９１４）跳起１巴仙，報４８﹒３５銀。亞洲水泥（００７４３）就仆低３巴仙，報１３﹒３６銀。天瑞水泥（０１２５２）漲２巴仙，報６﹒７銀。　　花旗國同伊朗嘅關係已經得進展，暗示中東地區嘅緊張局勢可能會得到緩解咁啵，油價自然走低啦！今日「三桶油」表現麻麻，其中同油價比較敏感嘅中海油（００８８３）走埋表現最差國貨佬，全日唔見２巴仙，報１３﹒１８銀；中石化（００３８６）蒸發逾半個巴仙，報５﹒１６銀；中石油（００８５７）無升跌，報４﹒２６銀。

＊野村又唱淡內房股未散，零售吹淡風金行真陰功＊

　　大行野村對神州磚頭佬出咗份報告，話內房中期核心盈利可以上升１２巴仙，但係毛利率會有所下跌，令業績表現中性及平淡，但估計大部分內房派息不會有驚喜。所以磚頭佬股價今日維持榮辱互見格局。融創（０１９１８）升近２巴仙，收報３９﹒７銀。「四條三」恆大（０３３３３）就勁囉，今日急升逾６巴仙，報２３﹒１５銀，聽日就公布業績，唔通預早炒定？！　　其他內房方面，奧園（０３８８３）走高３巴仙，報１１﹒６６銀；龍光（０３３８０）亦升近３巴仙，報１３﹒１４銀；新城發展（０１０３０）再彈３巴仙，報８﹒２銀；世房（００８１３）就唔見３巴仙，報２３﹒３５銀。　　周大福（０１９２９）公布咗首季數據，神州零售繼續增長兩成四，但港澳零售就下跌６巴仙，睇怕本港零售真係難做。攪到佢今日收跌近３巴仙，報８﹒５銀。周生生（００１１６）跟跌近２巴仙，報１１﹒５４銀。發咗盈警嘅卓悅（００６５３）今日亦唔見１巴仙，報０﹒１７２銀，不過成交１２萬銀都唔夠；莎莎（００１７８）就升返半巴仙，報２﹒２３銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》講述被情緒困擾真實個案，情緒病最終如何走出低谷？► 即睇