《小傳日記》踏入中資股放榜高峰期，香江魚缸將面臨另一波唔知係「衝擊」定係「沖喜」！不過，呢一波都仲未到，今日（２１日）二萬五大關就已經被震散，仲一度最低去到２４８９６點，距離十天線（約２４８５５點）５０點都無，嚇到好友腳仔都軟埋。　　個市由高位向下調整，除咗淡友借阿爺抽走１００億人仔呢個例牌菜外，匯豐中國８月ＰＭＩ初跌到去得５０﹒３，創左三個月新低亦係箇中原因；加上孖屐驚花旗國提早加息，都係今日嘅致命傷。最終恆指埋單碌低１６５點收２４９９４，唔能夠連續三日收高於二萬五之上，而國貨佬指數就跌得仲甘，唔見１１３點收１０９４２，十天、廿天線都穿晒。　　魚缸發軟蹄，缸友都急急腳沽貨走人，全日成交就多番約７巴仙，有７５５億銀左右。　　

＊魚缸唞大氣好友似被刮，港電訊批盪唯有急急撻＊

　　魚缸再一次去到咁高位，又有股東忍唔住要趁高「骨水」走人！噚日（２０日）收市之後，孖屐就傳出小小超旗下香港電訊（０６８２３）有股東減持套現走人。話口未完，今朝香港電訊就即刻錄得逾１３億銀配股上板，每股造９﹒０５銀，即係比噚日收市價折讓７巴仙，搞到股價一開場就向下碌，全日頭耷耷散場，結果收跌４巴仙報９﹒３６銀，成支大陰燭跌穿十天同廿天線，成交高達逾１７億銀。　　至於近排等「望百」嘅祖國移動（００９４１），同「望破頂」嘅ＱＱ（００７００）都齊齊跟住個市跌番落去。中移就仲未擺脫「炒人」傳聞，輕輕唔見０﹒３巴仙報９４﹒４銀；而ＱＱ就喺１３０銀上上落落，完場就報１３０﹒７銀跌近１巴仙。反而下星期二（２６日）放榜、弱咗好耐嘅雲遊（００４８４）就突然衝高近４巴仙，仲帶挈埋細細粒嘅手遊文化（０８０８１）抽高逾７巴仙，收０﹒１８７銀。　　　　　　　　

＊內銀驚壞帳最怕再受傷，９６６績靚粉絲即炒上＊

　　不過講到放榜，大大隻中資股先係剩餘業績期嘅焦點。今日就輪到祖國錢莊交行（０３３２８）接捧。老老實實，之前大隻佬輪流炒，小傳原本都對祖國錢莊寄予厚望，不過重農行（０３６１８）同中行（０３９８８）放榜之後，缸友個個都話驚不良貸款問題，又話擔心資產質素惡化，股價不升反跌。雖然交行（０３３２８）有改革概念，但今日遇著跌市，股價點會有運行，全日跌低近２巴仙，收５﹒６８銀。　　嚟緊幾間祖國錢莊業績都唔知有冇驚喜，抑或有驚冇喜，搞到股價已見企唔穩。工行（０１３９８）、建行（００９３９）均跌近１巴仙；農行（０１２８８）跌得仲多，唔見近２巴仙。之不過，祖國保險中國太平（００９６６）今日表現好勇猛，半年多賺１﹒７９倍，股價醒神晒，逆市衝高逾７巴仙，收１８﹒２６銀，認真叻仔！

＊盤數大飛躍中外運雀躍，中旅喜上喜個價即跳起＊

　　如果公司成績夠省鏡，就會好似今日隻中外運（００５９８）咁，急升近一成以５﹒２４銀收市，遠遠跑贏大市。升得咁勁，全靠份中期夠晒驚喜，正當大家一心諗住航運市場咁弱，忽略咗一班船仔股嘅時候，中外運竟然宣布多賺４３巴仙至６﹒４４億銀人仔，比舊年同期只係多賺１５巴仙進步勁多，缸友們梗係掃貨以示支持啦。　　中旅（００３０８）就更巴之閉，中期激賺９﹒３億銀，暴升１倍有多，連埋特別息共派５仙！唔單止咁呀，阿爺為出手推動發展旅遊業，中旅簡直又中獎，股價想唔坐火箭都唔得啦。收市飆升近１３巴仙收２﹒３９銀，最高仲去到２﹒４５銀，創２００８年５月以嚟新高添！

＊光伏將放榜你追我又趕，７１２午後忽然間好爽＊　　　　仲有一個板塊今日亦都靜靜起革命，缸友們千祈唔好走寶！多隻光伏股都排緊隊下星期放榜，龍頭協鑫（０３８００）其實近排都已經靜靜雞升番上嚟，今日以逾５億銀成交，逆市升近２巴仙，又去番２﹒８２銀呢個強大阻力位。而公司下星期四（２８日）就派成績，話唔定有機會勇破大關喎！　　　街坊卡姆丹克（００７１２）就遲一日揭盅，今日股價就升得仲勁，下半場突然發力急起直追，收市彈高逾７巴仙收１﹒５２銀。興業太陽能（００７５０）都係下星期四派，雖然只係升近３巴仙，但逆市有進帳，都已經算唔錯啦！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇