《魚缸博客》今日碧桂園（０２００７）股價大跌逾一成。據聞集團被債權人Ｅｖｅｒ　Ｃｒｅｄｉｔ　Ｌｉｍｉｔｅｄ昨日（２７日）向香港高等法院，提出清盤呈請，追討本金約１６億元未支付定期貸款及應計利息。高等法院已將首次聆訊日期定於２０２４年５月１７日。　　除左呢單料之外，今日原本有另一個利好消息。據《中國房地產報》報道，房地產融資「白名單」持續擴大。來自碧桂園方面信息，截至２月２７日，碧桂園已獲批進入房地產融資「白名單」嘅項目超過１００個，較春節前嘅３０多個大幅增加。只可惜，相比之下，被申請清盤呈請明顯更震撼。亦都係咁，碧桂園股價受挫之餘，連帶碧服（０６０９８）亦受拖累，股價暫時跌半成。　　碧服被拖累其實有啲無辜。碧服同恒大物業（０６６６６）嘅情況有啲唔同。恒大物業嘅大股東係中國恒大（０３３３３），阿媽有事，阿仔難免被波及。但碧服大股東並非碧桂園，而係楊惠妍。碧服同碧桂園嘅關係只可以話係兩姐妹。所以，就算碧桂園有事，碧服都唔會直接受拖累。何況，今日碧桂園嘅情況同上次中國恒大嘅情況唔同，中國恒大係比高等法院頒令清盤。而家碧桂園單料有排都未有結果，首次聆訊仲要排到５月中，最終判決結果更係未知之數。所以，就算對碧桂園有戒心，都無須同碧服保持距離。　　睇返恒大物業情況，即使阿媽中國恒大被頒令清盤並於１月２９日停牌至今。但恒大物業股價呢段時間不跌反升，累積升超過一半。同樣道理，碧服亦無理由因為碧桂園被申請清盤呈請而受到拖累。何況，碧服比起恒大物業有另一個優勢就係股息。碧服自２０１８年上市以來，派息一年多過一年，２０２２年度派息超過０﹒４港元，現價計約６厘多。所以，碧服橫睇掂睇都唔係差，股價跌反而係買入機會，根本唔使過分擔心。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【免費講座】陸叔《2024 投資心法·養生之道》講座► ►火速報名