《小傳日記》中美貿易戰預備第二輪開戰，其中花旗國大網企谷歌下令，要同華為割席，今日「孖屐」略有反應。其實手機出貨量都事小，因為華為一路係手機零件上有庫存，重可以頂得三幾個月都無問題，但重點係華為同好多國家簽訂咗５Ｇ網絡建設協議，而呢啲網絡建設有部分都係靠花旗國提供零件，如果華為搵唔到方法解決，分分鐘賠錢都賠死人啊陰功。　　個股方面，手機設備股今再因為華為事件跌到一仆一碌，但部分中資晶片股就逆市走強，因為神州吹晒雞，話中資晶片要自強，唔用美貨用國貨咁話。另外，有缸友睇唔到大市，資金轉追公用股避險，而地緣政治緊張推動油價上揚，「三桶油」都間接受惠；而萬洲就因為貿易氣氛差而再度急挫逾５巴仙，報７﹒１４銀，為是日最差藍戰士。　＊萬洲又再趴貿易氣氛差，ＱＱ跌到傻好友淚兩行＊　　　恆指早段曾高見２７９９９點，重上２５０天線（２７９６２點），但之後無以為繼，「孖屐」受悲觀情緒影響由升轉跌，並一度低見２７６９９點後跌幅收窄，最終收報２７７８７點，跌１５８點或逾半巴仙，成交額約１０５６億銀增長３巴仙；國貨指數收報１０６３３點，跌５５點或逾半巴仙。　　Ａ場全日低開低走，上證收報２８７０點，跌１１點或不足半巴仙；深證收報８９１６點，跌８４點或近１巴仙。兩市成交共４６２７億人仔跌一成九。　　重磅股方面，大象（００００５）輕微回吐，收跌逾半巴仙，報６５﹒２銀。生發發（００３８８）隨市下跌１巴仙，收報２４２﹒２銀。ＱＱ（００７００）表現失色，全日急挫近４巴仙，收報３４２銀。中移動（００９４１）靠穩收升近１巴仙，報７３﹒１銀。ＡＩＡ（０１２９９）表現牛皮跌３亳子，報７６﹒７５銀。　＊國貨當自強中芯逆市漲，手機股跌傷舜宇真惆悵＊　　　華為被花旗國第一輪封殺後，第二輪就被谷歌割席，外地傳媒報道指，話華為曾經思考過如果遇到封殺會點算，所以已經有Ｐｌａｎ　Ｂ咁話，而神州就吹晒風話國貨當自強，要用返祖國嘅晶片，今日相關股份都全力造好。中芯（００９８１）漲逾８巴仙，收報８﹒６７銀。ＡＳＭ太平洋（００５２２）都微升近１巴仙，收報７９銀。華虹半導體（０１３４７）飛起近２巴仙，報１５﹒３銀。上海復旦（０１３８５）漲逾１巴仙，報１０﹒４６銀。　　晶片股逆勢造好，但手機設備股就苦過弟弟，如果話為用唔到安桌系統，真係搵鬼買佢咩，所以肯定影響到其他手機設備股。舜宇光學（０２３８２）首當其衝急跌近半成，收報７２﹒４銀。另一「孖寶」瑞聲（０２０１８）就無咁傷，微升１亳子報４３﹒１５銀。比亞迪電子（００２８５）急降逾７巴仙，報１０﹒５６銀。丘仔（０１４７８）急急降逾８巴仙，報５﹒７３銀。鴻騰精密（０６０８８）瀉近３巴仙，報３﹒３１銀。　＊車佬死哂火走勢好坎坷，油組講掂數三桶油叫好＊　　　車佬全部無入油死哂火，加上人仔走低，缸友明顯散水唔撐場，大佬吉利（００１７５）早排公布４月銷量唔靚仔，加速北水急促沽貨套現，股份全日唔見逾３巴仙，報１２﹒６２銀。華晨（０１１１４）蒸發超過半成，報６﹒９２銀。比亞迪（０１２１１）走低近２巴仙，報４６﹒５０銀。廣汽（０２２３８）跌逾３巴仙，報７﹒３２銀。長汽（０２３３３）跟跌近３巴仙，報５﹒６６銀。　　中東局勢唔明朗，花旗國同油佬好似隨時就開火，「孖屐」擔心會擾亂油價穩定，所以個個入定貨先。另外，油組最新公布，會將減產協議延長至下半年，消息刺激國際油價再走高高，帶動「三桶油」向上當然無難度！中石化（００３８６）全日升近２巴仙，報５﹒７６銀。中海油（００８８３）揚２巴仙，報１３﹒６６銀。中石油（００８５７）同走高１巴仙，報４﹒６１銀。　＊資金要避險中電升勢掂，寬鬆政策續內銀可布局＊　　　嘩！華為畀花旗國封殺，令香江一眾科技佬全線跪低！不過有人愁亦有人歡喜，資金連日再走公用股避險，中電（００００２）同港燈（０２６３８）無懼「孖屐」傳香江要向神州買電嘅消息，今日齊齊走高，其中中電仲升近３巴仙，報８９﹒９銀，仲做埋今日表現最佳藍戰士，叻！港燈就只升一格，報７﹒６１銀。電能（００００６）微升近半巴仙，報５４﹒０５銀。但長建（０１０３８）就跌１毫，報６１﹒８銀　　領展（００８２３）繼續愈升愈有，漲近３巴仙報９７﹒５銀；港鐵（０００６６）跟升近２巴仙，報４８﹒９５銀；煤氣（００００３）升近２巴仙，報１９﹒３銀；香港電訊（０６８２３）升半巴仙，報１１﹒９８銀　　估值低表現又穩陣嘅內銀股，今日畀中金唱好。佢話預料神州嘅貨幣政策會繼續寬鬆，以支持實體經濟融資需求，加上一眾內銀佬早前已經有調整，所以預計嚟緊內銀Ｈ股會跑贏Ａ股咁話。四大行方面走勢各異，中行（０３９８８）升逾半巴仙，報３﹒５１元；農行（０１２８８）升一格報３﹒３５銀；建行（００９３９）無升跌報３﹒４９銀；工行（０１３９８）升１巴仙收５﹒５８銀。其他內銀佬方面，郵儲行（０１６５８）就升２巴仙，報４﹒５４銀；交行（０３３２８）同招行（０３９６８）就齊齊升近１巴仙，分別報６﹒１３銀同３７﹒４銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情