《小傳日記》上星期突如其來嘅一場德銀風暴，嚇窒全球魚缸，好彩柳暗花明又一村，有報道指德銀同花旗國司法部接近達成約５４億美金和解協議，遠低於早前提到嘅１４０億美金。有機會罰少成百億美金，德銀當然鬆一口氣，花旗魚缸上星期五（３０日）都反彈返１６４點收１８３０８點。　　Ａ場正放緊「十一黃金周」長假，難得外圍有好消息，香江魚缸今朝梗係跟住向上衝，恆指一開場就衝上３５５點報２３６５２。可惜大市始終唔夠力衝得太勁，恆指收市報２３５８４踢起２８７點，國指飛高１０１點報９６８３。而「港股通」暫時停開，北水唞唞之下，全日成交得返４８６億銀。　　＊十月開門紅好友齊起哄，瑞信叫沽售永利不輕鬆＊

　　馬交９月賭收１８４億澳門銀，按年增加７﹒４巴仙，連續第二個月回升之餘，仲遠勝孖屐預期。銀娛（０００２７）、金沙（０１９２８）應聲衝前近３同２巴仙，報３０﹒０５同３４﹒２５銀。新濠國際（００２００）更叻仔，彈高４巴仙，報１０﹒５８銀。而總裁艾智勤啱啱喺上星期五辭職嘅永利（０１１２８），卻慘遭瑞信叫「沽售」，逆流跣趴低３巴仙，收１２﹒４６銀。　　香江亦傳嚟好消息，十一黃金周第一日假期整體訪客增加約６巴仙，其中非內地旅客更急升２１巴仙。思捷（００３３０）、Ｉ﹒Ｔ（００９９９）齊齊跳起近５同４巴仙慶祝，報６﹒５９同２﹒６１銀。歐舒丹（００９７３）末期息２５仙今日除淨，雖然畀瑞信降「他屐」，全日依然斬穫１巴仙，埋單１５﹒３６銀。

＊彤叔離開了新世界靠穩，大象與渣打今天有尾陣＊

　　新世界（０００１７）創辦人鄭裕彤因病安詳離世，股價未受影響，今日升唔夠半個巴仙，報１０﹒１銀；新地（０００１６）遭交銀國際唱淡，畀「沽走」評級，目標價８４﹒１銀，腳軟唔夠半個巴仙，報１１６﹒９銀。　　德銀同花旗國司法部嘅官司有望達成和解，今日國際錢莊股紛紛造好，連日回購嘅大笨象（００００５）今日開會傾今年第三次派息，另有傳會關閉蘇格蘭科技中心炒９０人，今日行前近２巴仙，報５８﹒０５銀。渣打（０２８８８）亦有超過１巴仙升幅，報６３﹒１５銀。　　不過，有點值得留意，就係米字國首相文翠珊話，最遲３月底前啟動脫歐程序，今日英鎊兌美元曾跌至三個月低位，而米字國魚缸就無受影響，一度創今年以來新高。

＊調控又調控內房熱變凍？麥記來唱好石藥闖高峰＊

　　神州磚頭佬近期冇咩運行，皆因愈嚟愈多城市推出調控樓市措施，蘇州、天津都陸續喺國慶假前後出招，北京就限制首套房首付比例唔能夠低過三成五。潤地（０１１０９）再碌低近１巴仙，報２１﹒４銀；中海外（００６８８）更瞓低近２巴仙，得返２５﹒８銀，成為今日最差兩隻藍戰士。　　石藥（０１０９３）獲麥格理唱好，話佢可以得益於阿爺即將發布嘅新國家藥品清單。石藥即刻飛起近６巴仙，報８﹒２銀，更一度創近年半高８﹒２８銀。中生製藥（０１１７７）都唔執輸，踢高近６巴仙，收５﹒５銀。

＊股仔炒消息爆上非常醒，潤啤見異樣青啤亦抽升＊

　　早前急插７８巴仙停牌嘅航標（０１１９０）今朝早復牌，控股股東兼主席肖智勇可能賣股畀漳州四大國企集團，今日大反彈逾４１巴仙，收報０﹒４９５銀。　　開源控股（０１２１５）就飛咗上太空，無端端炒高１﹒３倍至０﹒１０８銀，勇奪最佳個股。居次位嘅海天天線（０８２２７），佢地同無人機公司合作，共同開發亞洲市場，呢排咁興航拍，缸友都好睇好今次合作，股價飛起近４５巴仙，報１﹒３９銀。　　冠軍科技（０００９２）主席簡文樂退休，仲打算賣曬Ｄ股權，結果跳起兩成，埋單０﹒１６１銀；阿仔看通（０１０５９）亦都有近１３巴仙進帳，報０﹒８銀。　　潤啤（００２９１）今日錄得好多單大手，夾夾埋埋有接近１﹒９億銀，大成交湧高近３巴仙，報１６﹒９銀。街坊青啤（００１６８）都急升逾６巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情