《小傳日記》侵侵又再放話，表示如果條件唔啱佢心意，佢可能會放棄同神州嘅貿易協議，令到貿戰陰霾繼續籠罩，但花旗國公布第四季嘅ＧＤＰ增長好過預期，成功挽回當地魚缸些少跌勢，最終道指只收低６９點，至２５９１６點；標指數微跌７點，至２７８４點；納指數走低２１點收７５３２點。　　今日神州可以話係雙喜臨門，ＭＳＣＩ朝早先宣布會將Ａ股納入因子由本來５巴仙增加到２０巴仙，今日香江開市一眾中資證商佬已經全線上揚，恆指今日亦高開８３點報２８７１６點。其後財新公布２月份神州製造業ＰＭＩ（採購經理人指數）比預期為好報４９﹒９，刺激Ａ場升幅擴大，香江跟勢而上，最多抽高２２７點見２８８６０點，雖然之後升幅略為收窄，埋單仍然有１７８點落袋，升幅逾半個巴仙，收報２８８１２，終止三連跌。主板成交１０８７億銀，比上日少逾１０巴仙。國貨方面收報１１５０６，升逾１巴仙或升１３９點。　　神州方面，上證以全日高收市，報２９９４升５３點，升幅近２巴仙，成交３０７３﹒３８億人仔。　　香江大隻藍戰士全線上揚，焦點就要講ＡＩＡ（０１２９９）同生發發（００３８８），前者今日再創股價新高７９﹒４銀，埋單收升近１巴仙，報７９銀；後者噚日公布「三年計劃」盼走向國際，今日加上ＭＳＣＩ升Ａ股權重嘅消息，令佢全日收漲近２巴仙，報２７５﹒４銀。大象（００００５）微升一格報６４﹒２銀。ＱＱ（００７００）自從上日阿爺公司新遊戲批號無佢份之後，升勢已無乜，加上有消息話佢開始測試一項兒童鎖模式，故埋單只係升４毫，收報３３６﹒２，無緣重上十天線（約３４０﹒３８銀）。

＊摩指擴權重券商佬受捧，博彩收入差銀娛急向下＊　　　　幾隻中資券商佬食住ＭＳＣＩ增加Ａ股權重嘅消息，大放異彩，官方話呢次增加權重可以為Ａ場帶嚟超過８００億美金，而招商基金嘅預估就更加進取，預料會帶為Ａ場帶來１０００到１５００億美金左右嘅新增資金，聽到有咁多水聲佢地當然再急升啦！廣發証券（０１７７６）炒高近５巴仙，報１３﹒８４銀；華泰六八八六（０６８８６）同海通證券（０６８３７）就齊齊走高４巴仙，分別報１６﹒５８銀同１０﹒８６銀；中國銀河（０６８８１）勁升近７巴仙，報５﹒７銀；中州證券（０１３７５）進帳近半成，報２﹒５９銀；中信証券（０６０３０）升近２巴仙收１９﹒３８銀。　　三隻主要嘅Ａ場ＥＴＦ都平均升幅近３巴仙，南方Ａ５０（０２８２２）報１４﹒５４銀，安碩Ａ５０（０２８２３）收１４﹒４２銀，華夏滬深三百（０３１８８）造４４﹒８銀。　　有人歡喜有人愁，馬交中午公布咗上個月嘅賭收數字，博彩毛收入有２５３﹒７億澳幣，按年只升４﹒４巴仙差過預期，一哥銀娛（０００２７）當災，係表現最差藍戰士，全日唔見超過２巴仙，收報５４﹒４銀；金沙（０１９２８）亦跌近半巴仙，報３９﹒０５銀。其他賭佬就做得唔差，其中噚日公布業績純利多賺四成半嘅澳博（００８８０）繼續有追捧，全日升近４巴仙，報９﹒１７銀；永利馬交（０１１２８）同美高梅中國（０２２８２）就分別升近２巴仙，各報１９﹒７４銀同１６﹒８銀；新濠（００２００）進帳近１巴仙，報１９﹒３２銀。

＊製造業復甦汽車再造好，魚缸好反覆藥股好難捉＊　　　二月份財新祉國製造業ＰＭＩ好過預期，砵砵車都幾乎全部升上漲，吉利（００１７５）一直走高，收報１５﹒４２銀，飆近５巴仙；長汽（０２３３３）揚逾３巴仙，報５﹒９４銀；華晨（０１１１４）同蘇寧簽訂戰略合作協議，一齊喺渠道互補、品牌推廣、系統研發、科技產品及開發等領域合作，今日升逾４巴仙，報８﹒０１銀；比亞迪（０１２１１）旗下同廣汽嘅合資公司通知部分前線員工，要放３個月假，令缸友懷疑佢生意係咪唔好，今日一度跌近１巴仙，但下晝返嚟逐步向好，收報５０﹒３５銀，微升亳半子。　　兩隻醫藥佬藍戰士今日表現麻麻，其中石藥（０１０９３）一直低迷，最終跌１巴仙收１３﹒２６銀，而中生製藥（０１１７７）一開市就急瀉，午市嘅時候更加係包尾藍戰士，但尾段竟然發力，收報６﹒８４銀微升近半巴仙。其餘醫藥股方面，噚日公布新藥註冊獲批嘅復星醫藥（０２１９６）今日高開低走，收市挫２巴仙，報２７﹒３銀；藥明生物（０２２６９）連挫４日後，今日股價反彈，飆逾４巴仙，報７７﹒８銀；噚日收市後宣布終止兩款新藥作臨床嘅上海醫藥（０２６０７），連跌三日，今日最低見１７﹒３８銀，穿埋２０天線（１７﹒４６２銀），收報１７﹒５４銀，跌近１巴仙；國藥（０１０９９）亦唔見逾１巴仙，報３４﹒５銀，係表現最差國貨佬。

＊聯通夥華為股價有作為，Ａ股攀高聳內險齊受捧＊　　　三大中資電訊佬齊齊升，其中中聯通（００７６２）宣布同華為攜手合作公共產業、醫療、金融、教育等領域，今日表現最標青，勁升逾４巴仙，報９﹒７１銀；神州移動（００９４１）揚近２巴仙，報８３﹒９銀；中電信（００７２８）亦升近３巴仙，報４﹒３６銀。其他５Ｇ通訊股方面，鐵塔（００７８８）就升逾１巴仙，報１﹒８９銀；京信通信（０２３４２）急升逾３巴仙，報２﹒１６銀。華南高能激光宣布成功試制全國首根單纖萬瓦級高功率光纖，打破國外壟斷，消息令已連跌３日嘅長飛光纖光纜（０６８６９）無機會喘息，今日最低見２７﹒０５銀，穿埋２５０天線（２７﹒７２１元），收報２７﹒９銀微跌一格！　　內險佬全線上揚，平保（０２３１８）自嚿年７月起，第１０次增持工行（０１３９８）股份，加上近日再炒分拆概念，今日都漲近２巴仙，報８４﹒２５銀。另外，下晝傳出今日部分內險佬潛在納入摩指，刺激內險佬全面上漲，人保Ａ股（滬﹕６０１３１９）今個星期已經第３日漲停，帶動Ｈ股（０１３３９）今日都急升逾３巴仙，報３﹒６７銀；國壽（０２６２８）今日高見２２﹒９銀，創１１個月新高，收報２２﹒８銀，升近６巴仙，包辦表現最好藍戰士同國貨佬首位，勁！太平（００９６６）同新保（０１３３６）亦齊齊升６巴仙，分別報２５﹒８銀同４０﹒３銀。祝大家周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情