政府宣布聽日(3月1日)開始全面取消口罩令，喺室內、室外同公共交通工具都唔使再佩戴口罩。醫務衞生局局長盧寵茂話，全面撤銷口罩令，代表所有社交距離措施正式結束，香港全面回復正常，期待明天會更好。
　　有啲零售股升到笑，例如莎莎(00178)曾經升超過4%，周大福(01929)亦曾經升超過1%。不過，今日信義系就唔係太識笑喇，事關佢哋公布咗舊年全年業績，表現麻麻哋。其中，信義光能(00968)舊年全年純利38.2億人仔，按年跌22.42%，差過「孖屐」預期，每股基本盈利42.95仙，派發末期息10仙，按年持平。期內收益205.44億人仔，按年升27.88%；毛利61.59億人仔，按年跌12.55%。
　　信義光能自舊年8月展開達兩個月嘅跌勢，10月尾跌勢喘定，並且開始反覆上升，但升到今年1月高位10.8銀後無力再上，跟住跌番落去，2月6日開始更加畀條廿天線壓住。今日股價低開1.52%，跌幅曾經擴大到超過7%。如果今日唔可以喺100天線之上收市，意味股價仲處於弱勢，估計下試8銀嘅機會幾大，無貨嘅朋友可以等到8銀附近先吸納。

《編者按》本欄搜羅即市傳聞，惟消息未經證實，《經濟通》亦不保證內容之準確性。

獨家優惠【etnet x 環球海產】用戶專享全場95折，特價貨品更可折上折。立即使用優惠代碼【ETN1WWS】，選購五星級酒店級海鮮► 立即瀏覽