《魚缸博客》「大家好，我是渣渣輝」呢句嘢相信好多人都聽過，但未必知道來源。其實佢係來自一隻手機遊戲，搵張家輝做代言，其實個遊戲未必真係咁好玩，但因為張家輝嘅「港普」而令人認識，呢隻手遊背後嘅公司就係中旭未來。　　中旭未來手上未必有最好嘅ＩＰ，但係網絡營銷上其實做得幾好，所以有段時期北水都係瘋狂落力炒，未必真係炒呢間公司業績有幾好；事實上公司剛剛公布業績，全年純利大跌５４％，所以基本面上無咩好炒作。　　有趣嘅係，呢間公司長期都有北水光顧，公司股權有五成係幾個大股東身上，街貨都係一半一半，但「真正」係街上有幾多就值得商榷。　　提醒返，呢隻股係歷史圖表上都有一兩次炒高炒低情況，唔排除有莊家打骰，想跟莊搵食定係做韭菜，睇清楚小小先做啦。　　今日突然炒高兩成四，成交有成六千七百幾萬，成交高、但買賣盤就唔算激烈，呢種股其實幾有鑊氣，如果你認為自己手快的話可以落場玩下，而家ＲＳＩ都係４０－５０之間，預計有機會繼續上，目標價睇幾多就無謂啦，呢類股份係睇分鐘圖做人，純粹今日寫一寫文提提大家呢隻股咁解。　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲第六屆國際信息商會議「最佳信息商」白金獎► 了解詳情