今日魚缸高開134點後，走勢持續向好，更重站21000關之上，收市能否守穩此關為後市關鍵。
　　外資近期轉軚睇好中資股，根據美國監管文件等資料，印證外資近月大舉增持中資股，相信此趨勢暫時唔會逆轉。
　　對沖基金每季向美國證券交易委員會(SEC)提交嘅13F文件顯示，傳奇對沖基金經理布瑞(Michael Burry)管理嘅Scion Asset Management，上季增持7.5萬份京東(09618)美國存託股票(ADS)及5萬份阿里巴巴(09988)ADS。
　　同樣加碼吸納上述兩股份嘅，仲有美資科技股對沖基金Coatue Management，上季分別淨買入122.2萬股京東及479.6萬股阿里巴巴；另一美資對沖基金Farallon Capital Management季內亦增持219.7萬股阿里。
　　先睇睇京東走勢，可能受對沖基金掃貨消息刺激，今日股價顯著造好，一度升近7巴仙，重返100天線樓上，9SRI回升至43水平，有對沖基金掃貨消息，相信股價唔難重上1月初高位約260銀；阿里巴巴方面，今日走勢同樣向好，一度逼近10天線水平，相信反覆後，股價可輕易重返1月底高位118.5銀。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】2026去邊最好玩？etnet為你提供全港最齊盛事活動，所有資訊盡在掌握！► 即睇