《魚缸博客》昨日提過，海南省三亞市喺農曆年假尾聲，機票出現一票難求嘅情況。原來，海南島除咗機票一票難求之外，經水路出島同樣唔容易。春運以來，由於客、貨運量大增，加上惡劣天氣影響，瓊州海峽經常出現大擠塞。喺海口新海港，大批車輛每日排隊等渡海。於是，瓊州海峽跨海大橋建設嘅議論再起，有網友通過政府熱線追問大橋係唔係會起。海南省發改委就回覆話：瓊州海峽水道繁忙，且地質構造和環境條件復雜，在瓊州海峽開展相關工程建設嘅可行性有待進一步研究。　　關於瓊州海峽跨海方案，其實早係１９９４年就開始有提及，當時由廣東、海南兩省聯合開展前期研究工作。２００８年３月，交通運輸部、原鐵道部、廣東省和海南省共同成立了瓊州海峽跨海工程前期工作領導小組。勢估唔到三十年後嘅今日，瓊州海峽跨海工程依然停留喺「有待進一步論證」嘅階段。放喺西方國家，可能因為環保或法律問題一拖再拖，拖住三十年都唔出奇，但放喺被喻為「基建狂魔」嘅內地，確實難以理解。　　過去幾十年，內地基建取得舉世矚目嘅成就，打通青藏高原，穿越新疆沙漠，橫跨雅西地震帶，令人嘆為觀止。無理由區區１８公里濶嘅瓊州海峽都征服唔到！又有人講，係鑑於海南作為自貿港需要封關。呢種講法仲奇怪，瓊州海峽兩岸有嘅係地皮，唔通搵唔到一塊地來做檢疫同通關？香港本身就係自由港，連接澳門珠海嘅港珠澳大橋一樣起到，點解一國一制下嘅海南島反而有呢樣嗰樣嘅問題？相信只有海南省官員先清楚。　　呢兩年內地嘅經濟增長放緩，搞多啲基建未嘗唔係一件好事。幾隻基建相關股近期嘅走勢都唔錯。無他嘅，業務穩陣，派息又穩陣，跌極有個譜。以中國中鐵（００３９０）為例，過去五年，無論營收定係股東應佔溢利都錄得溫和增長，加上市盈率低，息率又高達六厘，真係諗得過。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇