《小傳日記》花旗國魚缸隔晚（２４日）三大指數各走各，而且米字國首相約翰遜話下星期期限前脫歐搞唔掂，無咩特別好消息，令到香江魚缸今朝早（２５日）低開２點之後水位都喺咁跌。加上平保（０２３１８）業績無預期咁好，畀兩大行唱衰之餘，缸友們又喺咁掟貨，拖累哂魚缸一度唔見１７６點報２６７９７！不過，藥佬反而就無懼劣勢，今日逆市向上攀，其中石藥（０１０９３）及中生製藥（０１１７７）就有缸友十卜，包辦第一、二名最佳藍戰士！最終魚缸報２６６６７跌１３０點，跌幅約半個巴仙，失守十天線（約２６６８０點）。主板成交６７１﹒５９億銀跌逾２巴仙。國貨報１０４６６點，跌６６點或跌逾半個巴仙。　　一連四日嘅中共四中全面會下周一（２８日）開幕，Ａ場今日見升，上證指數報２９５４漲１４點，幅度都有半個巴仙。深成指數報９６６０升１０４點，升幅逾１個巴仙。兩市成交僅４０５７﹒７５億人仔。　　大隻藍戰士方面，大象（００００５）好似要喺中東、北非同土耳其地區進行新一輪裁員，今日軟腳不足半巴仙，報６１﹒６５銀。生發發（００３８８）微跌４毫子，報２４１﹒２銀。ＱＱ（００７００）有花旗唱好，升「他屐」到４３銀，全日蒸發近１巴仙，報３１６﹒６銀。ＡＩＡ（０１２９９）有瑞信維持評級「跑贏大市」，不過就降佢「他屐」到９１銀，埋單唔見近１巴仙，報７４﹒７５銀。神州移動（００９４１）軟腳逾１個巴仙，報６４﹒４５銀。

＊藥佬齊炒高油水撈一撈，百威成績差缸友唔再揸＊

　　Ａ場醫藥龍頭股恆瑞醫藥（滬：６００２７６）首三季業績靚仔到飛起，股價抽高近６巴仙收８７﹒５４人仔，連帶香江掛牌嘅醫藥佬逆市有缸友撐實，石藥鏟高近６巴仙，報１８﹒２８銀；中生製藥踢高逾３巴仙，報１１﹒３銀；康哲藥業（００８６７）落鑊炒高近７巴仙，報１１銀。另外，神州中藥（００５７０）亦起哄逾４巴仙，報３﹒８銀。藥明兄弟藥明生物（０２２６９）高逾２巴仙，報８１﹒８５銀；藥明康德（０２３５９）亦漲逾１巴仙，報８３﹒７５銀。　　百威啤酒（０１８７６）今日放榜，雖然首三季多賺半成，因價格穩定期完咗，所以明顯有啲回吐，全日最低見過２８﹒９銀，不過之後都有返支持，最終縮水近３巴仙，報２９﹒７銀。青島啤酒（００１６８）今朝都軟腳蟹，不過因為下星期一放榜，今日下晝又有番支持，全日鏟高近半成，報４６﹒５銀。華潤啤酒（００２９１）收高逾３巴仙，報４０﹒９銀。其他食品佬表現都唔錯，旺旺（００１５１）起哄逾１巴仙，報６﹒３７銀。蒙牛（０２３１９）亦生猛升近２巴仙，報３１﹒５銀。達利（０３７９９）省鏡高逾１巴仙，報５﹒２２銀。

＊賭股估值低唔買好蝕底，天然氣價漲中燃氣要搶＊

　　早前摩通就話而依濠賭估值水平對長期投資者而言喺買入良機，缸友睇都嚟都幾認同，喺咁掃貨，令部分濠賭佬連彈兩日，就好似銀娛（０００２７）今日踢高近１巴仙，報５２﹒３銀。新濠國際（００２００）跳起逾２巴仙，報２０﹒９５銀。澳博（００８８０）同永利澳門（０１１２８）彈起不足半巴仙，前者報８﹒２７銀，後者報１６﹒８４銀。金沙（０１９２８）同美高梅（０２２８２）跳高近１巴仙，分別報３８﹒６５元同１２﹒５４銀。　　又就嚟到冬天，神州湖南、西寧、南京等地區都密密上調天然氣嘅銷售價，令到燃氣佬今日表現好醒神。神州燃氣（００３８４）踼高近３巴仙，報３２﹒７銀。華潤燃氣（０１１９３）跳高近２巴仙，報４５﹒７５銀。新奧能源（０２６８８）彈起不足半巴仙，報８６﹒６５銀。昆侖能源（００１３５）小跳近１巴仙，報７﹒４６銀。不過，天倫燃氣（０１６００）就仆低逾２巴仙，報７﹒２９銀。

＊中移無料到電訊續回吐，平保唔爭氣內險被遺棄＊

　　神州電訊佬呢排就繼續無咩運行，中移動（００９４１）就連續三季純利下滑，５Ｇ建設仲有機會增加開支，所以佢三兄弟就繼續齊齊鏟落去。中移動、中聯通（００７６２）同中電信（００７２８）一樣碌跌超過１巴仙，分別報６４﹒４５銀、７﹒９８銀、３﹒４８銀。　　內險佬嘅大哥大平保公布業績，但就唔及預期，仲要比摩通同瑞信降目標價，搞到由山頂碌咗落嚟，仲要連累埋Ｄ兄弟。平保係今日表現最差的藍戰士同國貨佬，鏟低４巴仙，報９０﹒９銀；新華保險（０１３３６）跣低超過１巴仙，報３１﹒４銀；太保（０２６０１）、中人壽（０２６２８）同財險（０２３２８）就一樣微跌唔夠半個巴仙，分別報２９﹒３５銀、１９﹒５４銀、９﹒６８銀。祝各位周末愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》講述被情緒困擾真實個案，情緒病最終如何走出低谷？► 即睇