《小傳日記》正當大家以為疫苗出爐之後疫情會慢慢受控之際，米字國又出現變種新冠病毒，就算花旗國通過咗新紓困方案，孖屐都係俾疫情搞到心慌慌，隔晚美股三大指數升跌不一，但香江魚缸就低開４５點報２６２６０點，早段魚缸都尚算平靜維持窄幅上落，事關龍頭科網佬同新經濟佬撐得住個市，就算班濠賭佬同地產佬點累市法，半日都係好淡爭持報２６２８４點跌２２點。但午後魚缸就開始風雲變色，龍頭科網佬紛紛轉紅燈，濠賭佬同車佬又齊齊插水，加埋美股指數期貨又跌埋一份，道指期貨仲一度唔見１６０點，搞到魚缸頂唔順失守二萬六關報全日低位２５９９８點，好彩安踏（０２０２０）同舜宇（０２３８２）仲有力頂住恆指，其中安踏踢近４巴仙，報１１１﹒９銀，係今日最威藍戰士；吉利（００１７５）全日唔見逾５巴仙，報２２﹒１銀，係今日最曳藍戰士，最終香江魚缸收報２６１１９點，唔見１８７點或近１巴仙，主板成交１２３７﹒２６億銀，按日跌一成四。國指報１０３８４點，走低１７點或唔夠半巴仙。科指報８１８６，走上２６點或唔夠半巴仙。　　Ａ場兩市齊走低，上證綜指報３３５６點，跣６３點或近２巴仙，深證成指報１３８８２點，潛２５２點或近２巴仙；兩市全日成交９５７６億銀人仔，創１１月１０日以來高，較上交易日增一成一。　　大隻藍戰士方面，法工委表明修訂《反壟斷法》係出年嘅重點工作，嚇到阿里跪低近半巴仙，報２４８﹒８銀；工信部噚日點名ＱＱ（００７００）旗下兩款應用程式欺騙用戶下載，收市走上一格；大象（００００５）走低一格，報３９﹒４５銀；美團（０３６９０）唔見近１巴仙，報２７６﹒２銀；ＡＩＡ（０１２９９）潛水近２巴仙，報８８﹒１５銀；建行（００９３９）跣低近半巴仙，報５﹒６３銀。

＊疫情再轉差賭佬續向下，車佬榮辱見東風升勢現＊

　　全球疫情嚴峻，米字國又話有新毒株，搞到馬交政府又要加強防疫措施，要求入境馬交前１４日內去過神州同寶島以外地區嘅朋友，入境後接受３個禮拜隔離，馬交特首賀一誠仲話，新博彩法諮詢受疫情影響要延期到出年下半年，原本班濠賭佬仲以為等疫苗出爐捱多陣就有生意做，點知又疫情有排都未完，濠賭股齊挫，銀娛（０００２７）盤中最低見５６元創近一個半月低，唔見逾３巴仙，報５６﹒７５銀；金沙（０１９２８）都冇運行，跌穿十天（３４﹒３５銀）同廿天（３３﹒９４銀）線，全日潛水近４巴仙，報３３﹒３銀；新濠國際（００２００）腳軟近２巴仙，報１４﹒８４銀；澳博（００８８０）走落逾２巴仙，報８﹒６銀；美高梅（０２２８２）走低逾２巴仙，報１１﹒２銀。　　中汽協公布，神州１１月汽車商品進出口總額為１６３億美金，按月升逾６巴仙，按年更升近一成四。但多數呠呠車都係要走低，隔晚特斯拉加入標指後股價大插逾６巴仙，搞到比亞迪（０１２１１）跟住佢插水逾６巴仙，報１９３﹒７銀；吉利（００１７５）雖然被晨星升左他屐，但都係揹住個沽售評級，全日跌落逾５巴仙，報２２﹒１銀；廣汽（０２２３８）唔見近４巴仙，報８﹒０４銀；恆大汽車（００７０８）潛水近２巴仙，報２７﹒５銀；長汽（０２３３３）好彩俾招商唱好升他屐到２５銀，盤中一度見２０﹒９５銀破頂，收市走上近１巴仙，報２０﹒０５銀；東風（００４８９）預計全年汽車銷量達到１７﹒２萬部，超越今年目標，銷量按年升８巴仙，仲發布埋新能源車嵐圖，股價踢高近５巴仙，報８﹒３３銀。

＊冇國家補貼光伏佬價跌；病毒變變變油佬心驚顫＊

　　神州能源局局長話表示，之後新能源嘅發展基本上唔需要國家補貼，要由市場決定呀！光伏佬齊齊跳水，保利協鑫（０３８００）插低逾１２巴仙，報１﹒３１銀；協鑫新能源（００４５１）跪低近１２巴仙，報０﹒２１３銀；卡姆丹克太陽能（００７１２）無咗１０巴仙，報０﹒３１５銀；陽光能源（００７５７）唔見近５巴仙，報０﹒２９５銀；信義光能（００９６８）碌低近２巴仙，報１８銀。　　米字國出現新型冠狀病毒變種，病毒的傳播速度比過往的各種病毒株快７成，當地衛生大臣形容變種病毒已經失控，嚇到隔晚油價急挫，原油期貨喺亞洲時段表現都唔係咁好，三桶油走低，中石化（００３８６）唔見逾１巴仙，報３﹒３５銀；中石油（００８５７）碌低近３巴仙，報２﹒３４銀；中海油（００８８３）踼高１格，報７﹒２６銀。中海油服（０２８８３）走低近４巴仙，報６﹒２１銀；Ｆ三星原油期（０３１７５）無咗逾１巴仙，報３﹒０９２銀。

＊半新股熱炒京東健康跑；長和沽貨早時機真獨到＊

　　魚缸頹，半新股反而熱炒，京東健康（０６６１８）今日起納入港股通名單，個價又破頂，收喺全日最高報１７７﹒７銀，漲近一成。同樣破過頂嘅有玩具商泡泡瑪特（０９９９２），跳近２巴仙，報８９﹒１銀，盤中最高見９６﹒４５銀。加科思（０１１６７）穿底後調頭，跳高近４巴仙，報１４﹒９６銀；ＶＥＳＹＮＣ（０２１４８）漲近５巴仙，報１１﹒９２銀。　　焦點個股方面，據報花旗國商務部會公布涉及１０３間神州同俄國「軍方終端用戶」名單，限制花旗國企業同佢哋有貿易往來，之後有報道話長和（００００１）旗下有公司喺名單上，拖累股價見過近個半月低，雖然長和之後澄清已經賣晒嗰間公司嘅持股，仍未能扭轉股價頹勢，收挫近３巴仙，報５２﹒５５銀。香江供水協議嘅條款文件已提呈立法會，廣東省政府將實際水價凍結喺今年水平，粵海投資（００２７０）喺香江嘅供水商，彈近１２巴仙，報１４﹒１２銀。花旗國國土安全部話審查緊ＴＣＬ電子（０１０７０），聲稱發現佢喺所有電視機上安裝後門，令用家面對數據外洩嘅風險，蒸發近１５巴仙，報５﹒２１銀。傳字節跳動正就溢價收購中手游（００３０２）談判，字節跳動之後否認傳聞，中手游仍起哄升近１巴仙，報３﹒１１銀，請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇