《小傳日記》隔晚花旗國「孖屐」忽然彈起，因為中東緊張局勢開始降溫，伊朗就話自然只係作出反擊，而唔係想惹事生非；侵侵（特朗普）就話伊朗呢次偷襲美軍基地係無人死，而且好小事。兩位大佬都唔想開波，魚缸今日都有返小小聲氣。睇下個別板塊，手機佬連跌兩三日後立即回氣，瑞聲（０２０１８）、舜宇（０２３８２）今日高開高收，走勢強勁！之後內地公布全年ＣＰＩ數據靚仔，消費股落獲炒起，恆安（０１０４４）激升８巴仙，係今日最好藍戰士！下午三時許，神州商務部就話副總理劉鶴決定預備去花旗國簽協議，魚缸再飛多轉！最終以全日最高位收２８５６１點，升４７３點或近２巴仙，主板成交９５７﹒３８億銀跌唔夠１巴仙。國企指數報１１２８１點，升２０１點或２巴仙。　　Ａ場今日都狀態回勇，上證綜指收報３０９４點，升２７點或近１巴仙；深證指數收１０８９８點，升１９１點點或近２巴仙。兩市合共成交７０６６﹒１９億人仔。　　大隻藍戰士方面，大象（００００５）微升近１巴仙，報５９﹒８５銀；生發發（００３８８）走勢強勁升逾２巴仙，報２７２﹒８銀；ＱＱ（００７００）漲逾２巴仙，報３９０銀；中移動（００９４１）都踢高近２巴仙，報６４﹒８５銀；ＡＩＡ（０１２９９）升逾２巴仙，報８５﹒６銀。

＊手機佬回勇裂口向上衝，閱文見高位新經濟架勢＊

　　中東嗰邊氣氛緩和，缸友緊係開心笑，而神洲商務部話副總理劉鶴預備要去花旗國簽協議，手機佬立即再飛，瑞聲（０２０１８）同舜宇（０２３８２）齊齊彈起開，前者收漲逾４巴仙，報６６﹒４銀；後者飛起近７巴仙，報１４１銀。其他手機佬表現都唔差，比亞迪電子（００２８５）高收逾４巴仙，報１６﹒９６銀；丘仔（０１４７８）抽高逾６巴仙，報１３﹒５６銀；鴻騰精密（０６０８８）升逾３巴仙，報２﹒６８銀。　　手機佬走勢向好，連帶新經濟股都有唔錯表現，美圖公司（０１３５７）升近３巴仙，報１﹒５５銀；閱文集團（００７７２）激升近８巴仙兼見１０個月高，報４０銀；同程藝龍（００７８０）升近２巴仙，報１３﹒４銀；美團點評（０３６９０）漲近２巴仙，報１０８﹒４銀；阿里巴巴（０９９８８）踢高逾２巴仙，報２１５﹒６銀。

＊經濟若亨昌願聞酒肉香，豬仔好活躍酒鬼乾萬酌＊

　　神州統計局今日公布上年１２月，全國居民消費價格（ＣＰＩ）同比上漲逾４巴仙，雖然低過孖屐預期，但都係上年１月以嚟嘅８年高位。食品煙酒類價格同比升近１３巴仙，影響ＣＰＩ（居民消費價格指數）上漲大概３﹒８２個百分點。食品入面，豬肉價格升咗近一倍，影響ＣＰＩ上漲大概２﹒３４個百分點。刺激豬仔係咁彈，最肥美係萬洲國際（００２８８）全日Ｋｅｅｐ住向上，收彈逾５巴仙，報８﹒７８銀。惠生國際（０１３４０）唔執輸都彈超過３巴仙，報０﹒１１７銀；中糧肉食（０１６１０）微跳一格報２﹒３３銀。　　經濟數據大派定心，再加埋新年係酒精飲品消費旺季，酒鬼們今日都算飲得杯落，青啤（００１６８）漲近３巴仙，報５０﹒１５銀；潤啤（００２９１）午後愈升愈勁，最高彈超過４巴仙，收市稍為喘定漲３巴仙報４２﹒８銀；百威亞太（０１８７６）冇乜點郁過，軟一格報２６﹒３銀。

＊美伊勢緩和缸友笑呵呵，避險勢如去油金跌幅巨＊

　　伊朗向駐伊拉克花旗軍基地發射導彈襲擊，花旗國總統侵侵星期三（８日）話件事無人死，但佢又冇提到會派軍隊即刻還拖，淨係話已經做好應對一切嘅準備。呢兩個國家緊張局勢算拖慢咗，油價即刻跌番落去，原油期貨價格周三大幅下跌逾４巴仙。花旗國原油２月期貨都跌近５巴仙，係上年１２月中以嚟嘅最低收盤水平。油股唯有跟大隊，中石油（００８５７）盤中試過跌２巴仙，午後跌幅收窄，收盤落１巴仙報４﹒１銀；中海油（００８８３）漲兩格報１３﹒６８銀。中石化（００３８６）升唔夠１巴仙報４﹒７７銀。　　避險情緒少咗，隔晚金價都回落超過１巴仙，金佬近乎全線趴低，靈寶黃金（０３３３０）仆得最勁大跌８巴仙收報１﹒３２銀，中國白銀（００８１５）都唔弱，跌逾７巴仙報０﹒８８銀；招金（０１８１８）同中國黃金（０２０９９）跣近４巴仙，分別報８﹒９７銀同６﹒９７銀；ＳＰＤＲ金（０２８４０）同恆興（０２３０３）就齊齊跌近３巴仙，報１１３１銀同３﹒１銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇