最近筆者放工見到有機械人喺街上行，放假又見到無人小店用機械人沖咖啡，諗起如今內地獨角獸猛攻機械人領域，相信技術普及之後，連百X匯同X澤都買得到個AI家務助理！當然都有唔少人都會諗，未來係唔係有機會買個AI男/女朋友番屋企？唔好意思，阿爺拍板：冇得傾。

　　優必選(09880)近日喺發布會度正式推出咗「優世界U1系列」全尺寸超仿生機械人，仲搵埋知名音樂人Alan Walker宣傳，點解？原因係佢哋之前出嘅機械人個名就係「Walker」……咳咳，講番正題，今次呢個機械人為咗滿足地球人嘅「願望」，皮膚用獨創仿真油性材料同凝膠，而且經過10次以上精密上色，可以睇清毛孔、指紋、微血管，模仿人類皮膚，另外擁有「全時自鎖仿生頸椎」，機械人冇電嘅時候可以好似人類咁固定。

　　佢哋個發布會現場就展出咗幾十款外觀，而且重點介紹咗主打「深邃側顏」、「硬朗下顎線」嘅霸道總裁「凌夜」，同埋「優雅靈動」嘅女機械人「小優」，「小優」喺發布會開頭仲跳咗段舞添，筆者就咁睇，雖然動作係有少少kick，但如果實際使用都有呢個水準，咁都叫交到貨。

　　重點嚟啦，優必選聲稱U1機械人係可以1:1複製明星，動漫角色，甚至copy自己或者身邊人個樣，吓，有啲恐怖喎！不過優必選好強調佢係「情感陪伴型機械人」，而唔係「機械人伴侶」，咩意思？即係用家要同機械人玩「柏拉圖戀愛」，唔好真係當機械人係你老公/老婆！

　　內地之前公布咗《人工只能擬人化互動服務管理暫行辦法》，禁止智能體危害用戶身心健康，誘導情感依賴，禁止智能體提供虛擬伴侶服務，同埋要建立未成年人模式，意思好明顯，你哋唔好諗住用AI做「壞事」！所以優必選今次正撞政策槍口，因為U1機械人主打嘅就係情感共鳴大模型，可以自定義外貌同性格，再加上「愛是永恒」嘅主題，實在好難唔令人有遐想。

　　不過除咗政策風險之外，今次個機械人最多人批評嘅就係續航問題，最高規格嘅高動態版U1 Ultra入面，男款賣99萬人仔，女款賣88萬人仔。賣成一球嘢，但續航得個2至4個鐘，所以當你同個機械人一齊燭光晚餐緊嘅時候係極有可能突然冇電，從機械人變植物人。優必選就回應返，話依家啲人形機械人續航時間都係差唔多㗎，屬於「行業普遍情況」，但係每隔幾個鐘就要叉電其實都幾影響體驗㗎嘛，買返嚟諗住談吓心結果突然冇電，咁到底係佢陪我定我伺候佢？

　　話雖如此，據聞呢個機械人喺發布會正式推出之前，據報訂單已經超過1.3萬部，要知道上年優必選嘅人形機械人都只係賣咗1079部，直接超過咗上年十倍。佢哋嘅CEO興奮到話今年年底之前會交付晒咁多部機械人，依家第一個交付日就定喺9月16號，現階段產能夠唔夠用都係一個問題。

　　到底呢批機械人落地之後會係驚喜定驚嚇？大家到時拭目而待，不過筆者建議用家都係唔好太沉迷，一旦阿爺監管升級，強行修正機械人嘅「大腦」，連玩「人機戀」都要失戀，噉就真係真心錯付喇，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】黃錦輝涉嫌酒後駕駛辭任立法會議員，你認為現行立法會議員的操守問責機制是否足夠？ ► 立即投票