《魚缸博客》全國政協會議今日開幕，香港魚缸今日反覆偏軟，落筆時，恒指跌緊幾點，Ａ股兩市指數同樣下跌。翻睇過去十幾年嘅情況，兩會期間Ａ股下跌嘅概率比較大。相反，兩會閉幕後，股市上升概率會高啲。始終呢幾年港股走勢同Ａ股越來越緊密，所以呢幾日就算跌少少都無需擔心。　　反而，今日理想汽車（０２０１５）跌幅高逾１０％，就有啲出乎意料。事關上個禮拜一（２６日）港股收市後，集團公布嘅第四季業績好過市場預期，理想嘅美國預證券高收１９％。第二日嘅港股表現仲勁，收升超過２５％。但估唔到唔夠一個禮拜，股價表現差天共地，令人唏噓。查實，今日並無重大利淡消息。集團上周五（１日）仲發布首款５Ｃ高壓純電ＭＰＶ（理想ＭＥＧＡ），呢個型號擁有１００款標準配備嘅旗艦配置，充電１２分鐘可以續航５００公里，全國統一零售價５５﹒９８萬人仔。　　除咗ＭＥＧＡ外，理想仲發布另外三款新車，售價介乎３１﹒９８萬至４５﹒９８萬人仔。另外，集團又提到，將大規模開始超充網絡建設，未來計劃投入至少６０億人仔，建設超過５０００個直營５Ｃ充電站。而採用加盟模式的城市充電站，亦將會喺今年大規模投入使用。　　上述公布，都唔算係咩利淡消息。弊就弊在電動車兩大龍頭比亞迪（０１２１１）同特斯拉中國近日都宣布減價，特斯拉Ｍｏｄｅｌ３╱Ｙ更減至２５萬人仔左右。大敵當前，加上同業公布嘅２月份銷量大多錄得下跌。投資者當然唔敢掉以輕心，賺錢嘅難免要獲利離場，高位接火棒嘅同樣會有人選擇壯士斷臂，止蝕離場。畢竟呢個板塊今年面臨嘅挑戰唔少。所以，股價今日跌成咁又唔算突然。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情