《古臣周記》為咗挽救經濟於衰退邊緣，歐美各國政府都大印銀紙買債谷經濟。喺無限ＱＥ同零利率嘅背景下，金價自然亦都水漲船高，除咗保值抗通脹之外，仲有避險嘅作用。正因為咁，有華爾街大行睇好金價會繼續高高高，突破每盎司２０００美金添！　　黃金之可以喺低利率嘅環境之外受追捧，主要因為黃金唔係想印幾多就可以印幾多，數量有限，而且息率降低亦減低咗持金嘅機會成本。同樣道理，有固定發行量嘅虛擬貨幣嘅比特幣（Ｂｉｔｃｏｉｎ），又可唔可以喺低利率甚至將來負利率嘅環境下抗衡通脹？　＊區塊獎勵定時減半，比特幣供應受限＊　　　　比特幣雖然係一種虛擬貨幣，但總發行量係固定嘅，唔係隨便撳個掣就可以無限生產，所以唔會有濫發嘅風險。比特幣總產量恆定為２１００萬個，每四年產量減半，目前已挖出１８００萬個，只剩低３００萬個未挖出。係點計出來架？就係靠逐步削減「挖礦」嘅利潤（獲取比特幣作獎勵），當獎勵嘅比特幣減少咗，新供應自然減少，直至２１００萬個就停頓。咁當然，入面「挖礦」使用嘅工具唔係鋤頭或者挖掘機，而係具備強大運算能力嘅電腦，當中涉及嘅技術複雜，阿臣係度就唔詳細講啦。　　　　　　　　喺２００８年面世嘅比特幣，規定每隔四年就進行一次「減半」，亦即係減少現行挖礦一半嘅利潤。而今年就係史上第三次比特幣減半啦，更準確啲來講喺上星期二（５月１２日）比特幣已經完成咗呢個過程。對上一次區塊獎勵係１２﹒５個比特幣，呢次減半完成後，挖出每個區塊嘅獎勵將變成６﹒２５個比特幣。　＊比特幣走勢大上大落曾逼近二萬美金＊　　　比特幣喺２０１６年「減半」後，價格由當時不足１０００美元，反覆向上喺２０１７年年底到達歷史高位近２萬美金，但其後反覆下跌，喺２０１９年年頭已經回落至３０００幾美金嘅水平，之後同一年又再上過１２０００幾美金嘅近期高位。而今年比特幣喺３月環球股災時曾經低見３８６７美金，但近排比特幣嘅價格已經回升至近萬美金水平，現價報９７５５美金。　　根據之前兩次「減半」嘅經驗，比特幣需要約一年幾嘅時間，先會到達該段時期嘅最高位。新加坡加密貨幣基金ＳｔａｃｋＦｕｎｄｓ近日就發表報告指，預期比特幣係今年底至明年初有很大機會展開新嘅升浪，又指，當全球多國開始出現負利率時，比特幣可成為價值儲存工具。　　有分析指，環球央行因應新冠疫情推出大量刺激措施，啟動貨幣寬鬆，增加法定貨幣嘅供給，將導致出現大規模嘅通貨膨脹，因此對沖通脹比過去任何時做都要重要。而由於比特幣供應可控，以及未來交易愈來愈趨向數字化，都可能令比特幣喺２１世紀扮演住同２０世紀嘅黃金一樣嘅角色。　　著名對沖基金經理鍾斯（Ｐａｕｌ　Ｔｕｄｏｒ　Ｊｏｎｅｓ）月頭嘅時候話過，比特幣令佢諗返上世紀七十年代嘅黃金，當時全球都渴望新嘅安全資產，所以自己都買緊比特幣來避險，而當中利潤率最大嘅資產相信係比特幣呢隻黑馬。　＊此虛擬貨幣非彼虛擬貨幣＊　　　講到虛擬貨幣，相信大家呢排都有聽過央行例如神州嘅央媽都話積極發展「央行虛擬貨幣」。根據國際結算銀行早前發表嘅研究報告顯示，新型疫情喺全球流行，有機會改變民眾嘅付費習慣，發行虛擬貨幣希望達到無接觸及全球通用嘅目的。但之前各國政府唔係都好反對機構例如Ｆａｃｅｂｏｏｋ發行自己嘅虛擬貨幣嘅咩？點解突然解禁？其實央行虛擬貨幣同一般虛擬貨幣如比特幣係有分別。　　根據神州《人民網》嘅文章指出，央行虛擬貨幣只係人民幣嘅數碼版本，功能同特性都同法定貨幣相同。虛擬貨幣使用嘅核心技術區塊鏈令虛擬貨幣達到去中心化、不可竄改、可追蹤同加密安全等目的，但央媽嘅虛擬貨幣未有完全使用區塊鏈技術，而係採用中心化管理，來監管虛擬貨幣嘅流通，同虛擬貨幣「去中心化」嘅理念有所衝突。　　不過，阿臣認為，央行推動虛擬貨幣嘅發展，唔多唔少都會加強虛擬貨幣嘅廣泛使用。再加上資產保值嘅需求及比特幣「挖少見少」，相信比特幣再挑戰歷史高位亦唔係難事，阿臣都拭目以待。

＊微盟回調至６元再加注＊

　　呢兩日阿臣個倉隻微盟（０２０１３）表現唔錯，加上互聯網Ｓａａｓ股受惠內地擴展網上銷售，前景可期，所以打算趁佢回落至６蚊邊再加注買２手。而古臣持倉本周繼續按兵不動。

　　表列截至５月２０日阿臣投資組合表現：　　　股份　　　　　　股數　　　　　平均買入價（元）　　　現價（元）　　　總值（元）　－－－－－－－－－－－－－－－－－－－－－－－－－－－－－－－－－－－－－－－－　　港股：　　　ＳＰＤＲ金ＥＴＦ　　１０股　１０９７﹒００　　　１２７４﹒００　　　１２７４０　　平安好醫生　　　　２００股　　　５２﹒９０　　　　　９９﹒７５　　　１９９５０　　阿里巴巴　　　　　１００股　　１７６﹒００　　　　２０８﹒８０　　　２０８８０　　微盟集團　　　　２０００股　　　　４﹒５５　　　　　　７﹒２６　　　１４５２０　　三一國際　　　　２０００股　　　　４﹒１１　　　　　　４﹒０６　　　　８１２０　－－－－－－－－－－－－－－－－－－－－－－－－－－－－－－－－－－－－－－－－　　股票市值　　　　：　　　７６２１０元　　剩餘現金　　　　：　　１２７６２０元　　組合淨值　　　　：　　２０３８３０元　　組合本月收益表現：　　＋　１﹒３％（截至上月底止組合淨值：２０１２７０元）　　組合累計收益表現：　　＋９４﹒１％（本金１０５０００元計）（２０１６年８月開倉）　　　＊數據截至今日上午１１：１５ａｍ

全新節目《說說心理話》青少年不可以戀愛！？真實個案講述驚心動魄經歷► 即睇