《小傳日記》花旗國經濟數據較預期差，隔晚花旗魚缸繼續個別發展。香江魚缸半日仍然悶市，今早輕微低開９１點報２４３７３點，早段曾倒升５８點，半日高見２４５２３點，重上十天線（約２４５３８）。不過ＡＩＡ（０１２９９）等金融佬挨沽，拖累魚缸，半日反覆滑１６點收報２４４４８點。但午後個市即刻醒神，外電話神州將加快購買花旗國農產品，加上摩通上調本地磚頭佬評級，磚頭佬齊齊跑出，魚缸一度飆３１１點，報２４７７６點。最終魚缸埋單報２４６４３點，升１７８點或升０﹒７３％，主板成交１５１４﹒５５億銀，較上日大增近兩成半。國企指數報９９７４點，升５８點或升０﹒５９％。　　Ａ場兩市集體踢高。上證綜合指數報２９６７點，升２８點或升０﹒９６％。深證成份指數報１１６６８點，升１７３點或升１﹒５１％，兩市合計成交７７８８﹒５３億銀人仔，較上日多近３巴仙。　　重磅藍戰士方面，ＱＱ（００７００）同生發發（００３８８）齊齊破頂，ＱＱ收升半巴仙，報４６０﹒４銀，高見４６５﹒６銀；生發發漲超１巴仙，報３００﹒４銀；大象（００００５）揚近１巴仙，報３７﹒３５銀；建行（００９３９）走高超１巴仙，報６﹒２６銀；神州移動（００９４１）升一毫半，報５４﹒２５銀；友邦（０１２９９）跌兩毫，報７１﹒８銀。

＊摩通轉睇法磚頭佬齊發，獲中金加持內房佬飛馳＊

　　大行摩通喺最新報告入面調整左對本地磚頭佬睇法，其中上調對九置（０１９９７）同新地（０００１６）嘅評級，本地磚頭佬跑出。九置踢高超６巴仙，報３９﹒１銀；新地升超２巴仙，報１０３﹒２銀；新世界（０００１７）漲４巴仙，報９﹒５９銀；信和（０００８３）同恆地（０００１２）齊抽升近２巴仙，分別報１０﹒０２銀及３０﹒９５銀。　　內地磚頭佬同樣獲大行中金加持，中金就話判斷今年下半年內地房地產行業基本面穩中向好，加上宜家板塊估值及倉位處歷史底部，睇好內地磚頭佬表現。時代中國（０１２３３）漲超２巴仙，報１５﹒０２銀；奧園（０３８８３）升近４巴仙，報９﹒９３銀；恆大（０３３３３）走高超４巴仙，報２０﹒５５銀；龍光（０３３８０）上揚超２巴仙，報１４﹒２６銀；融創（０１９１８）揚２巴仙，報３５﹒０５銀。

＊蘋果最暢銷瑞聲升勢囂，芯片佬升完飛到腳仔軟＊

　　有市調機構公布今年第一季全球高端手機市場數據，蘋果嘅ｉＰｈｏｎｅ１１手機成為最暢銷高端手機，足足佔成個高端手機「孖屐」三成嘅市場份額成「手機王」！加埋有消息傳出話近期不斷有內資買入瑞聲，琴日更加有大手入貨１０７萬股咁多，令到瑞聲再次炒上３月中以嚟嘅高位，一次過拉起哂啲手機佬！瑞聲科技（０２０１８）飛近７巴仙，報４６﹒４５銀；高偉電子（０１４１５）飛近７巴仙，報０﹒８９銀；丘鈦科技（０１４７８）彈近２巴仙，報１０﹒４銀。不過同係手機孖寶嘅舜宇（０２３８２）則趴低１巴仙，報１１４﹒１元；　　而芯片大佬中興通訊話「孖屐」都好關注嘅５納米芯片要喺２０２１年推出啦！目前佢地公司嘅７納米芯片都已經進行緊規模量產，令到中興嘅Ａ、Ｈ市股價齊齊爆升，單計香江今日已經升穿埋３月中以來的高位，仲帶埋中芯一齊升！依家睇芯片佬略為回吐咗啲落黎，但普遍嚟睇都仲好有追捧！中興通訊（００７６３）潛近３巴仙，報２７﹒０５銀；中芯國際（００９８１）跪低逾１巴仙，報２２﹒９銀；中電華大科技（０００８５）瀉逾１巴仙，報０﹒８３銀；上海復旦（０１３８５）彈落近１巴仙，報６﹒３７銀。

＊富時有調整阿里健康醒，有大行睇好二線軟件掃＊

　　富時中國５０指數收市後調整成分股名單，當然就有人歡喜有人愁啦！獲納入嘅包括有阿里健康（００２４１）飛升８巴仙，報２２﹒０５銀；阿里巴巴（０９９８８）升近１巴仙，報２１９銀；翰森製藥（０３６９２）升逾２巴仙，報３９﹒４銀；被剔出嘅包括有申洲國際（０２３１３）跳升逾２巴仙，報９７﹒６５銀；新華保險（０１３３６）彈近２巴仙，報２６﹒８銀；中交建（０１８００）漲近１巴仙，報４﹒６６銀。　　　資金轉炒部分二線軟件佬，今日走勢都唔錯！獲摩通睇好業務轉型嘅匯付天下（０１８０６）急飆逾５２巴仙，報２﹒８銀；新意網（０１６８６）抽升超半成，報５﹒７銀；網龍（００７７７）彈起近９巴仙，報２２﹒８５銀；金蝶國際（００２６８）揚２巴仙，報１５﹒８８銀；；金山軟件（０３８８８）漲近２巴仙，報３０﹒２銀。祝大家周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇