《小傳日記》隔晚（２０日）花旗國「孖屐」現回吐，但跌幅亦唔算大，大家都觀望緊聽日（２２日）出爐嘅聯儲局議息紀錄，以及之後Ｊａｃｋｓｏｎ　Ｈｏｌｅｓ央行年會，睇下聯儲局主席鮑威爾會唔會透露下花旗國官方點睇經濟前景。連帶香江魚缸今日（２１日）初段走勢放緩，恆指低開７１點之後就跌幅擴大，低見２６０７５點跌１５５點，之後就拗腰反彈「轉燈」，最多一度升８６點，高見２６３１８點，尾市保持係２６２００點關口上上落落咁。個股方面，煤氣（００００３）成績表唔合格，股價潛一潛水；但藥佬就因為國策影響而大幅上揚。最終恆指收報２６２７０點，升３８點，成交７５０﹒９４銀跌逾半成。國貨都輕微高收近半巴仙或４４點，報１０１７７點。　　Ａ場同樣表現牛皮，上證收報２８８０點，升不足１點。深証收報９３２２點，跌５點。兩市合共成交４５４４﹒５１億人仔。　　重磅藍戰士都表現悶局，大象（００００５）微跌２亳子報５７﹒２銀。生發發（００３８８）漲近１巴仙，報２５４﹒４銀。ＱＱ（００７００）牛皮跌８亳子收３３２﹒６銀。中移動（００９４１）微軟近半巴仙，報６６﹒９５銀。友邦（０１２９９）升１亳子，報７７﹒５銀。　＊內房醒目仔雅居樂威威，阿爺出國策藥佬有辦法＊

　　雅居樂（０３３８３）公布中期純利升三成半，其中全年目標已經達成到五成二，真叻仔！所以今日股價都叻叻豬抽高逾半成，報１０﹒３８銀。其他內房大佬都表現唔錯，「四條三」恆大（０３３３３）飛起逾１巴仙，報１８﹒４２銀；融創（０１９１８）踢高近３巴仙，報３５﹒４５銀；碧桂園（０２００７）抽高近２巴仙，報１０銀；萬科（０２２０２）彈逾１巴仙，報２８﹒２５銀；潤地（０１１０９）急升逾４巴仙，報３２﹒８５銀，係今日最佳藍戰士！　　阿爺又推新國策，要將１２８隻新藥納入擬談判准入範圍，而且有部分重係癌症、糖尿病藥。藥佬真係有計，今日都有唔錯表現，中生（０１１７７）領軍升近４巴仙，報１０﹒４６銀。石藥（０１０９３）跟住造好揚逾３巴仙，報１４﹒９銀。國藥（０１０９９）飛起近２巴仙，報２８﹒５銀。金斯瑞（０１５４８）升近１巴仙，報１８﹒１６銀。翰森（０３６９２）都抽高近２巴仙，報２３﹒７５銀。

＊公用佬走弱煤氣氣盡洩，磚頭佬疲倦股價續悶局＊

　　今日公用佬表現不一，中華煤氣（００００３）中期純利跌近１９巴仙至３８﹒８９億銀，而且畀野村睇淡降「他屐」到去１３﹒１銀，埋單仆低逾５巴仙，報１６﹒２銀，做埋今日最差藍戰士。中電（００００２）同電能實業（００００６）齊齊軟腳不足半巴仙，分別報８２﹒４５銀同５４﹒３５銀。港鐵（０００６６）彈起一格報４８﹒７銀。領展（００８２３）跳起半巴仙，收報９４﹒３銀。　　香江磚頭佬今日盡顯疲憊，齊齊跌低哂。恆基地產（０００１２）軟腳不足半巴仙，報３８﹒８銀。新世界發展（０００１７）機場航天城項目批圖則，將建５幢商廈，該股全日蒸發逾半巴仙，報１０﹒２２銀。九龍倉置業（０１９９７）仆低１亳子，報４６﹒７銀。長實（０１１１３）建議用約２５２億港銀嘅現金，去收購喺米字國上市嘅英國釀酒廠，同英式酒館營運商ＧＲＥＥＮＥ　ＫＩＮＧ　ＰＬＣ全部股權，上日急升後走軟，今日埋單跌１亳子報５５﹒４銀。雖然嘉里建設（００６８３）出成績，中期基本盈利飆一倍，埋單都要碌低近２巴仙，報２９﹒１５。

＊中興升得快小米現頹態，業績好倒米金軟無眼睇＊

　　雖然華為喺花旗國嘅禁令仲未解桀，但神州手機佬仍有望借發展５Ｇ跑出，中興（００７６３）同海信集團達成合作協議，發展５Ｇ醫療同交通等範疇，急漲近６巴仙，報２０﹒７銀。但同業小米（０１８１０）就唔多高興啦，上半年少賺近三成四，第二季更大幅倒退八成六，雖然大行野村唱好佢毛利率同出貨量好過預期，維持買貨評級，但都阻止唔到佢插水半成，報８﹒９６銀。同為５Ｇ概念嘅手機股昂納科技（００８７７）都被業績拖累，跣低近７巴仙，報３﹒８銀。街坊聯通（００７６２）呢排踩行油，飆逾２巴仙，報８﹒０４銀。　　手遊佬今日走勢都幾極端，焦點之一嘅金山軟件（０３８８８）中期盈轉虧，蝕近１５億人仔，被大行紛紛削「他屐」，一度急瀉近一成一，收市仍挫近半成，報１４﹒５銀；早前曾經發盈警嘅第七大道（００７９７）午後成交突然大增，飆逾一成三，報１﹒９７銀。ＩＧＧ（００７９９）表現唔錯，走高４巴仙，報５﹒６９銀；創夢天地（０１１１９）起哄一格報４﹒４９銀。金蝶（００２６８）就跌逾１巴仙，報７﹒６６銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇