《小傳日記》花旗國９月份嘅製造業活動數據喺十年嚟最弱，令到「孖屐」更加擔心中美貿易戰對經濟嘅影響，所以搞到花旗魚缸噚晚（１日）趴低哂。　　今日（２日）香江魚缸跟隨美股走勢，低開１９０點，報２５９０１，加上噚日本地示威活動加劇，令到魚缸都無咩ｍｏｏｄ，恆指早段仲曾低見２５７７８挫３１４點，失守二萬六。不過，有消息話神州再批准國企同民營企業購買６０萬噸美國大豆，令到市場都安樂返少少，跌幅都逐漸收窄。最終收報２６０４２，跌４９點，主板成交６１９﹒４５億元。國企指數報１０１８２，跌１８點。Ａ場因為國慶放假休市。　　大隻藍戰士方面，有傳大象（００００５）嘅匯豐美國，連同其他５間銀行因為匯報疏忽而被罰逾６００萬美金，大象埋單撻低近１巴仙，報５９﹒６５銀。生發發（００３８８）唔見近１巴仙，報２２８﹒４銀。ＱＱ（００７００）縮水近２巴仙，報３２５銀。ＡＩＡ（０１２９９）彈起不足半巴仙，報７４﹒３５銀。　　另外，恆安（０１０４４）喺全日表現最差藍戰士同國貨佬，縮水逾２巴仙，報５０﹒２５銀。

＊紅日商場閂磚頭卻上攀，站內設施損港鐵未停喘＊

　　噚日香江各區都爆發大型衝突，雖然差唔多有成３０個商場都因為咁而暫停營業，但就無咩點影響到本地磚頭佬今日表現，當中新世界發展（０００１７）就有支持，逆市踢高近３巴仙，報１０﹒４６銀，仲喺表現最好嘅藍戰士。新地（０００１６）旗下１１個商場停業，今日埋單仍彈近１巴仙，報１１３﹒９銀。信和置業（０００８３）亦跳起半巴仙，報１１﹒８４銀。領展（００８２３）旗下黃大仙中心南館及北館關閉，全日仍跳起近１巴仙，報８６﹒９銀。不過，有部分地產及收租股就跟住大市仆低，冠君產業信託（０２７７８）軟腳不足半巴仙，報５﹒０６銀。　　今日公用佬表現就一般般，皆因噚日示威者喺六區集會嗰時造成好多破壞，尤其喺港鐵（０００６６）就損失慘重，總共有４７個重鐵車站關閉，超過２０個車站設施受損，埋單仆低逾１巴仙，報４３﹒５銀。其他公用佬都跟住碌低，中電（００００２）唔見逾１巴仙，報８１﹒１５銀。電能實業（００００６）同長江基建（０１０３８）彈起１巴仙，分別報５３﹒２銀同５３﹒２５銀。

＊唉瘋賣唔停瑞聲價續升，十一黃金周食品股落後＊

　　自９月２０日起新唉瘋開賣至今，睇來低機價魅力一直存在，其中新機缺貨問題令到要延期發貨，綠色機要三至四星期新有貨，消息刺激蘋果都急升，今日手機佬都表現唔差，瑞聲科技（０２０１８）升逾１巴仙，報４２﹒０５銀。舜宇光學（０２３８２）漲近２巴仙，報１１７﹒２銀。比亞迪電子（００２８５）飛高逾３巴仙，報１２﹒１２銀。丘鈦科技（０１４７８）漲近１巴仙，報８﹒５３銀。鴻騰精密（０６０８８）跌逾半巴仙，報３﹒２銀。　　十一黃金周喺神州展開，但係今日堆食品股都係走弱，唔知係咪因為上面經濟差，班基金佬覺得消費力弱呢？統一企業（００２２０）低走逾２巴仙，報８﹒２６銀。中國旺旺（００１５１）回吐近半巴仙，報６﹒２４銀。華潤啤酒（００２９１）跪低近２巴仙，報４０﹒８５銀。蒙牛乳業（０２３１９）逆市漲逾１巴仙，報２９﹒７銀。不過，新上市嘅百威亞太（０１８７６）竟起飛逾５巴仙，報２９﹒７銀！

＊中燃氣急漲麥格理頌唱，野村感樂觀內房兩極郁＊　　　　麥格理發表大行報告，將中燃氣（００３８４）評級由「中性」升至「跑贏大市」，「他屐」由３３﹒７銀升至３６﹒４銀。中燃氣今日飛起近３巴仙，報３１﹒２銀，仲喺表現最好嘅國貨佬！元亨燃氣（００３３２）抽高逾３巴仙，報０﹒５銀。京能清潔能源（００５７９）升近１巴仙，報１﹒３１銀。天倫燃氣（０１６００）隨市跌近２巴仙，報７﹒３３銀。北京燃氣藍天（０６８２８）跌逾２巴仙，報０﹒２０９銀。　　野村同樣都出報告，對內房睇法都比較樂觀，其中９月多間內房嘅合約銷售強勁，比較看好５間內房。融創（０１９１８）微跌近半巴仙，報３１﹒３５銀。世茂房地產（００８１３）漲逾１巴仙，報２３﹒２銀。旭輝（００８８４）微軟近１巴仙，報４﹒５４銀。奧園（０３８８３）踢高逾半巴仙，報８﹒９３銀。華潤置地（０１１０９）升一格報３２﹒９銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇