《魚缸博客》話說光伏大佬信義光能昨日（２９日）終於公布業績，截至２０２３年１２月３１日止全年純利４１﹒８７億元，按年升９﹒６％；每股基本盈利４７﹒０４仙，派末期息１５仙，按年升５０％。　　呢個成績表係咪算靚仔？博客覺得不過不失啦，叫做有增長有數據。但股價沉左好耐就真，２１年叫見過高位接近２０蚊，而家得４﹒６４，跌幾多博客都費事督機計，股價沉底未必關佢業務本身事，純粹係因為大市差、資金流走咁解。　　唔少大行都看好，紛紛調高目標價，花旗睇５﹒８，德銀睇５﹒２，富瑞睇４﹒２６。　　其實光伏呢一行早幾年真係幾好景，不過由於中美博弈關係，信義都因為呢個原因股價節節敗退；加上光伏成本不斷下降，所以必先要以「量」取勝，奈何美國呢個大客仔又玩技巧，唔係加稅就禁止你入口，總之要玩死你為止。　　不過，博客認為，世界唔會永遠一樣，中美關係都係。今年就係大選年，邊一個當選，都會影響到美國對華態度，所以博客認為先階段可以入小小貨，畢竟股價都屬於低水平位置；但係炒唔炒得起，關鍵就係做於美國邊個做總統、究竟對華態度會唔會再開放。　　博客留意到，其實美國本土一路就話禁華禁華，但有部分美國廠商都偷雞同中國做生意，畢竟中美博弈呢啲都係政治手段，要搵錢先係硬道理，你話係咪啊哈姆太郎？　《編者按》本欄搜羅即市傳聞，惟消息未經證實，《經濟通》亦不保證內容之準確性。

【免費講座】陸叔《2024 投資心法·養生之道》講座► ►火速報名