《小傳日記》花旗國魚缸噚晚輕微縮水，不過今日北水終於返番嚟，今朝魚缸高開２７點，報２５８４８點，但又有消息話，神州唔太想收窄同花旗國磋商嘅貿易議題範圍；加上花旗國商務部將多間神州公司放入貿易黑名單，而且近期香江示威衝突未減，缸友都有啲擔心，魚缸早段曾低見２５７６１跌６０點。　　不過，Ａ場放咗咁多日假返嚟就回勇，即使９月財新服務業ＰＭＩ回落，創七個月新低，Ａ場依然生猛鏟高，帶動魚缸高見２６１８０踢高３５９點，收復二萬六之餘，亦破咗十天線（約２６０４５點），半日醒神踢高近兩百點。　　不過，食完晏之後Ａ場力有不逮開始縮水，魚缸都跟住回番，縮到近只有百點升幅，最終魚缸埋單收報２５８９３點，彈起７２點或唔夠半巴仙，成交額８３１﹒８９億銀，按日升近２２巴仙。國貨收１０２０１點，高５４點或逾半巴仙。　　神州Ａ場放完假返嚟回勇，上證報２９１３踢高８點或近半巴仙。深證報９４７４起哄２８點或近半巴仙，兩市成交３７３１億人仔。　　大隻藍戰士方面，大象（００００５）可能再裁最多一萬個員工，全日踢高近半巴仙，報５８﹒４５銀。生發發（００３８８）放棄對倫交所嘅婚約，雖然董事都好失望，但全日反彈逾２巴仙，報２３１﹒２銀。ＱＱ（００７００）繼續回購，加上新手遊下載量勁，最終踢高近半巴仙，報３２３﹒８銀。神州移動（００９４１）５Ｇ預約用戶已經達到逾５６０萬人，收高１毫子，報６５﹒１銀。ＡＩＡ（０１２９９）跟住魚缸高逾半巴仙，報７３﹒９５銀。　　另外，恆安國際（０１０４４）跪低近２巴仙，報４９﹒６銀，係全日表現最差國貨佬。

＊藥股有追捧中生好得寵，全港爆示威磚頭佬失威＊

　　Ａ場醫藥佬今日係威係勢，帶動香江醫藥佬一同抽高，有分析話帶量採購將會打低細藥廠，令大藥廠受惠，中生製藥（０１１７７）急升近３巴仙，報１０﹒４８銀。石藥（０１０９３）飛起近７巴仙，報１７﹒１銀，係今日表現最好藍戰士同國貨佬。藥明生物（０２２６９）升近１巴仙，報８０﹒６５銀。翰森製藥（０３６９２）微漲近半巴仙，報２３﹒２銀。恆大健康（００７０８）抽高逾６巴仙，報７蚊。　　香江連日爆發示威，令多個商場都提早關門，本港磚頭佬已經跌咗好多日，其中新地（０００１６）跌逾１巴仙，報１０９﹒７銀。新世界（０００１７）跪低近３巴仙，報１０﹒１４銀，係今日表現最差藍戰士。信和置業（０００８３）跌近１巴仙，報１１﹒６銀。太古地產（０１９７２）挫逾２巴仙，報２４﹒０５銀。九置（０１９９７）潛逾１巴仙，報４１﹒８銀。

＊黃金周唔曳食品股得米，體品有追捧安踏向上衝＊

　　神州啱啱先完結十一黃金周，有數字顯示全國零售同餐飲企業實現銷售額１﹒５２萬億人仔，按年升近９巴仙。今日大部分食品佬都落鑊炒起，啤酒新貴百威亞太（０１８７６）飛起近４巴仙，報３１﹒６銀。統一（００２２０）漲近４巴仙，報８﹒６１銀。潤啤（００２９１）抽升逾３巴仙，報４２﹒６銀。蒙牛（０２３１９）彈近２巴仙，報３０﹒６銀。達利食品（０３７９９）升逾２巴仙，報４﹒９１銀。　　食品股造好，連帶體育用品佬都一齊抽高，早前有國策推動下，相關魚毛已經炒過一輪，今日又再起飛，３６１度（０１３６１）急漲近３巴仙，報１﹒７７銀。安踏（０２０２０）微漲逾半巴仙，報６８銀。特步（０１３６８）微跌近半巴仙，報４﹒４１銀。李寧（０２３３１）彈近３巴仙，報２４﹒１銀。神洲動向（０３８１８）升近４巴仙，報０﹒８６銀。

＊富豪夥吉利股價又飛起，油價急急漲鐵鳥突轉弱＊

　　早排缸友都驚神州經濟開始軟腳蟹，搞到砵砵車啲股價踩行油衝晒落山，但估唔到砵砵車咁快又蜈蚣彈。好似吉利（００１７５）咁，突然話同富豪一齊搞下新發動機，仲要比大摩唱好，升「他屐」六成到８銀，今日咁就鏟高逾３巴仙，報１３﹒５２銀。廣汽（０２２３８）同北汽（０１９５８）分別飆高近３巴仙同近２巴仙，分別報７﹒８２銀及４﹒７１銀。　　神州鐵鳥就縮晒水，事關油魔又再出現，油價喺亞洲時段反彈造好，布油同紐油仲一度勁升一巴仙，國航（００７５３）、南航（０１０５５）埋單一齊跌逾４巴仙，分別報６﹒６５銀同４﹒５３銀。東航（００６７０）就跌近半成，收報３﹒６７銀。「劇飛」（００２９３）低飛近四巴仙，報９﹒５９銀。神州飛機租賃（０１８４８）亦蒸發１巴仙，報８﹒０４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇