《小傳日記》上星期有消息話侵侵（特朗普）打算將花旗國魚缸入面嘅神州魚毛放走，缸友都擔心貿易戰又再進一步升級，花旗國魚缸撻低。雖然神州９月製造業ＰＭＩ輕微回升到４９﹒８巴仙，好過「孖屐」預期，但魚缸今朝（３０日）都低開１１０點，報２５８４４，之後仲最低見２５７８６縮水１６８點，不過神州９月財新製造業ＰＭＩ達５１﹒４，係連續三個月回升，顯示製造業持續有改善，魚缸即時來個蜈蚣彈，半日埋單前踢高逾百點。下晝Ａ場表現開始唔太理想，不過魚缸反而愈升愈有，曾經高見２６１６１漲２０７點，國慶前啲憧憬返晒嚟，不過後段都回吐番部分漲幅，最終魚缸今個月最後一個交易日，全日埋單踢高１３７點，報２６０９２，同十支陰燭講ＢＹＥ－ＢＹＥ，成交約７３３億銀多逾三成八。國貨報１０２００踢高５２點或逾半巴仙。　　Ａ場軟腳蟹，上證指數報２９０５，劈２６點或近１巴仙。深證成指報９４４６亦跌１０２點或逾１巴仙。兩市全日成交僅３５２５億人仔。　　大隻藍戰士方面，有傳大象（００００５）已經搵咗獵頭公司搵新ＣＥＯ人選，全日踢高近１巴仙，報６０﹒４銀。有傳生發發（００３８８）要借錢買倫交所，可能缸友都撐，今日漲逾１巴仙，報２３０銀。侵侵可能唔再畀神州魚毛入花旗魚缸，ＱＱ（００７００）縮水８毫子，報３３０﹒２銀。ＡＩＡ（０１２９９）跌一格報７４﹒０５銀。　　不過，全日表現最差差藍戰士係創科（００６６９），縮水逾１巴仙，報５４﹒５５銀。復星國際（００６５６）就畀大摩降「他屐」逾三成，評級亦降到「持平」，全日剎車近３巴仙，報９﹒７銀，係全日表現最差國貨佬。

＊藥佬個別走石藥最憂愁，缸友賀國慶旺旺氣勢勁＊

　　今日醫藥佬表現不一，平時成日畀缸友炒嘅石藥（０１０９３）同中生製藥（０１１７７）都軟腳近１巴仙，分別報１５﹒７４銀同９﹒９６銀。白雲山（００８７４）亦唔見近２巴仙，報２５﹒８５銀。不過，部分醫藥佬就好生性，三生製藥（０１５３０）鏟起逾３巴仙，報１３銀。康哲藥業（００８６７）起飛逾２巴仙，報９﹒３２銀。　　聽日就係「十一國慶」，好多神州缸友都準備好放大假，買定零食喺屋企，所以大部分食品佬今日又剔高！好似旺旺（００１５１）就彈起逾２巴仙，報６﹒２７銀，仲係表現最好嘅國貨佬！澳優（０１７１７）上周五（２７日）回購３０萬股，埋單起飛逾１１巴仙，報１０﹒２４銀。蒙牛（０２３１９）跳起不足半巴仙，報２９﹒３５銀。康師傅（００３２２）趴低近２巴仙，報１１﹒０４銀。統一企業（００２２０）踢高逾１巴仙，報８﹒４６銀。

＊突發大油田中油喜連連，國家又出招豬肉股拗腰＊

　　中石油（００８５７）最新話喺鄂爾多斯盆地勘發現咗１０億噸級嘅慶城大油田，消息刺激佢踢高，終於結束咗三連跌，全日醒神升近２巴仙，報４﹒０３銀。另外國際油價反彈，其他石油佬亦都跟住一齊升埋上嚟。中石化（００３８６）升逾１巴仙，報４﹒６６銀。中海油（００８８３）企穩無升跌，報１１﹒９６銀。中石化油服（０１０３３）升逾１巴仙，報０﹒８２銀。中海油田服務（０２８８３）升半個巴仙，報９﹒３７銀。　　豬瘟問題令到豬肉佬近排表現都相當反覆。嚟跟就「十一國慶」，為咗保障豬肉供應穩定，神洲商務部又再放１萬噸豬肉。自呢個月１９日，阿爺已經放咗三次合共三萬噸凍豬肉。消息一出，一眾豬肉佬再次回吐。雨潤（０１０６８）吐逾２巴仙，報０﹒９２銀。惠生國際（０１３４０）趴底逾２巴仙，報０﹒１２銀。超大現代（００６８２）無升跌，報０﹒０５７銀。大成食品（０３９９９）亦趴底逾２巴仙，報０﹒４４銀。

＊５Ｇ快步走聯通好抖擻，租賃有市場內房走勢強＊

　　中聯通（００７６２）今日開始５Ｇ套餐嘅預約，刺激佢今日走高逾１巴仙，報８﹒３２銀。目前三間神州電訊佬嘅５Ｇ套餐都發布晒，其中中電信（００７２８）預約已喺２９號啟動，中移動（００９４１）則２０號啟動。今日其他電訊佬走勢都唔錯，中移動升逾１巴仙，報６４﹒８５銀。中電信就升不足１巴仙，報３﹒５７銀。　　神洲住建部部長王蒙徽之前話，之後將會大力發展同培育住房租賃市場，要因地制宜咁發展共有產權住房，穩步推進城鎮棚戶區改造。消息一出，內地磚頭佬認真醒神，今日世茂房地產（００８１３）漲逾２巴仙，報２２﹒９銀。龍湖（００９６０）都唔錯升近２巴仙，報２９﹒３銀。恆大（０３３３３）升逾１巴仙，報１６﹒７銀。潤地（０１１０９）亦都升近２巴仙，報３２﹒８５銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇