《小傳日記》神州同花旗國好快就會簽署首階段貿易協議，但花旗國財長姆欽就事前表明，係達成第二階段之前，都會維持對神州嘅關稅。大隻佬指數就僅僅高開５點，之後受呢個壞消息影響，ＱＱ（００７００）失守４００銀大關，加上本地磚頭佬同手機設備佬齊齊插水，令大隻佬指數曾經最勁碌低２６６點見２８６１９點。　　食完午飯，大笨象（００００５）、生發發（００３８８）同埋本地磚頭佬齊齊回升，令大隻佬指數就跌少咗。最終收低１１１點，跌幅近半巴仙，報２８７７３點，主板成交１００４﹒３１億銀少咗約１６巴仙。國企指數報１１２９５點，跌５９點，幅度約半個巴仙。　　Ａ場都無運行，上證綜合指數收報３０９０點，跌１６點，幅度約半個巴仙。深證成分指數收報１０９７２點，跌１６點。兩市總成交６１１０﹒７４億人仔。　　重磅藍戰士方面，ＱＱ軟半個巴仙，報３９８﹒８銀；ＡＩＡ（０１２９９）走低近１巴仙，報８６﹒６５銀；建行（００９３９）軟兩格報６﹒７３銀；生發發漲近１巴仙，報２７９﹒８銀；大笨象升一格報５９﹒８銀。　＊潤地賣樓好股價升唔高，孖屐又跌倒物管反叫好＊

　　潤地（０１１０９）公布去年累積銷售額２４２５億銀人仔升一成五，潤地成績咁勁，但因為今日「孖屐」無力，潤地只高收近半巴仙，報３６﹒６銀；中海外（００６８８）潛近半巴仙，報２９﹒４５銀；融創（０１９１８）跪低近３巴仙，報４３﹒９銀；碧桂園（０２００７）跌逾１巴仙，報１２﹒０６銀；萬科企業（０２２０２）跌１巴仙報３２﹒１５銀；「四條三」恆大（０３３３３）跌近半巴仙，報２２﹒３５銀。　　今日「孖屐」高開低走，物管佬再成為避險新寵兒，雖然雅生活服務（０３３１９）早前遭到股東減持，今日走勢話俾你聽：「無有怕！」雅生活服務飛起逾１巴仙，報３０﹒９銀。新城悅服務（０１７５５）漲近３巴仙，報１２﹒８銀；綠城服務（０２８６９）高收逾３巴仙，報９﹒０５銀；永升生活服務（０１９９５）踢高近３巴仙，報６﹒７５銀；彩生活（０１７７８）進漲逾１巴仙，報４﹒３５銀。　＊美圖新業務股價大踏步，減稅莫奢求舜宇價更愁＊　　　新經濟魚毛今日各游各水。美圖（０１３５７）話要喺未來３年，除咗繼續喺影像、美妝同皮膚管理行業發展，亦會逐步發展醫學美容行業添呀！佢勁彈彈１０巴仙，報１﹒９銀。阿里巴巴（０９９８８）畀前身係雅虎嘅股東Ａｌｔａｂａ沽貨，跣逾１巴仙報２２０﹒８銀。小米（０１８１０）話會確保喺印度嘅新機型會喺網上同門市同時推出，刺激隻股收喺全日最高位１２﹒２６銀彈近５巴仙，創逾８個月高，勁呀！ＱＱ今日滑唔夠半巴仙，報３９８﹒８銀；平安好醫生（０１８３３）跳起近２巴仙，報６０銀。　　之前有流料話，花旗國會暫緩實施對華包括電子產品嘅總值１５６０億美金嘅１５巴仙關稅，但係花旗財長努欽同貿易代表萊特希澤發表之後發表聯合聲明話，兩個國家都無話要減關稅，手機設備股咪轉升為跌囉，舜宇光學（０２３８２）跌近１巴仙，報１４１﹒２銀；高偉電子（０１４１５）微滑三格報２﹒３５銀；鴻騰精密（０６０８８）彈近３巴仙，報２﹒７２銀；比亞迪電子（００２８５）跣低逾１巴仙，報１７﹒０６銀。瑞聲（０２０１８）升逾１巴仙，報６５﹒４銀，但已經係升幅最大藍戰士啦。　＊獲大行睇好金軟實飆到，破頂無難度愛康向上掃＊　　　最近麥格理恢復追蹤金山軟件（０３８８８），中信建投都唱好中軟國際（００３５４），搞到軟件佬齊齊逆市起動！金軟全日起飛１１巴仙，報２４﹒１銀；中軟國際踼高４巴仙，報４﹒９１銀；網龍（００７７７）彈起約半成，報２１﹒５５銀；金蝶（００２６８）起哄逾２巴仙，報９﹒１９銀。　　除軟件佬，麥格理同樣看好醫療設備佬，當中畀愛康醫療（０１７８９）「跑贏大市」評級，搞到佢繼續創新高，他Ｄ兄弟自然齊齊Ｈｉｇｈ！愛康飆９巴仙，報１２﹒２４銀；春立醫療（０１８５８）創新高，起飛逾８巴仙，報６３﹒９５銀；康德萊醫械（０１５０１）同破頂，踼高逾６巴仙，報３６﹒８５銀；威高股份（０１０６６）炒高２巴仙，報１０銀；但微創醫療（００８５３）唔生性跌兩格報９﹒４９銀。請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情