《小傳日記》噚晚（１５日）花旗國４月嘅零售銷售意外輕微撻低，但花旗國魚缸醒神，道指收２５６４８點漲１１５點，標指升１６點報２８５０點，納指漲８７報７８２２點。不過，花旗國商務部話，將華為同７０間關聯企業列入黑名單，今後如果未有花旗國政府批准，唔可以向美企買電子元件。　　受華為消息影響，香江魚缸朝早已經低開１５１點報２８１１７，加上ＱＱ（００７００）季績雖然盈利勝預期，但收入差過預期，股價低開約２巴仙，加上一眾手機設備佬走低，恆指更一度插水２１７點低見２８０５０點，失守百天線（約２８１８３點）。不過，之後Ａ場反彈帶動魚缸由跌轉升，內房佬、醫藥佬、食品佬持續攀升，魚缸最高見２８３７９踢高１１１點。午後魚缸原地踏步表現牛皮，升幅大部分時間維持喺約１００點之內，尾段神州商務部更話，唔掌握花旗國貿談表代訪華嘅計劃，反駁花旗國財長努欽話好快訪問北京繼續講數嘅說法，最終全日埋單收報２８２７５，微升６點，主板成交９４９﹒８９億銀減少逾１巴仙。國貨就收１０８１１，微升７點。　　Ａ場方面，上證收報２９５５，升１７點，升幅逾半個巴仙。深證收報９２９３，升３４點，升幅亦近半個巴仙。兩市成交５２２２億元人仔。　　香江大隻藍戰士普遍向上，ＱＱ放榜首季純利近２７２億人仔勝預期，不過收入增長唔理想得近８５５億人仔，雖然野村、瑞信、摩通繼續睇好，全日埋單縮水逾２巴仙，報３６５﹒６銀，係表現最差紅戰士。神州移動（００９４１）繼續縮水近１巴仙，報７１﹒２５銀，低見７０﹒９５銀，創近９個月低位。生發發（００３８８）仆低４毫子，報２４７﹒６銀。大象（００００５）今除息進帳亳八子，報６６﹒１銀。ＡＩＡ（０１２９９）輕微跣低逾半巴仙，報７７銀。　＊侵侵封華為舜宇好閉翳，貿戰牽連廣５Ｇ佬抓狂＊　　　花旗國總統侵侵決定繼續打擊華為，該國商務部仲將華為同７０間關聯企業列入實體清單，禁止花旗國企業買威脅國家安全嘅通訊商品，手機設備佬受牽連全線剎車。華為供應商舜宇光學（０２３８２）最慘，瀉超過半成，報８５﹒０５銀，仲係包尾藍戰士。另一個藍戰士瑞聲（０２０１８）亦唔太生性，軟近３巴仙，報４４﹒６５銀。富智康（０２０３８）走低近４巴仙，報１﹒０１銀。丘鈦（０１４７８）回吐近３巴仙，報７﹒４２銀。通達集團（００６９８）輕微跣低逾１巴仙，報０﹒６９銀。比亞迪電子（００２８５）亦縮逾１巴仙，報１２﹒９２銀。　　除咗手機設備佬受影響之外，神州５Ｇ佬今日都腳軟。華為同業中興通訊（００７６３）最受影響挫逾６巴仙報２１﹒４銀，最低見２１﹒３銀，創咗逾一個月低位。京信通信（０２３４２）瀉逾４巴仙，報１﹒６３銀。中通服（００５５２）走低逾３巴仙，報６﹒１１銀。鐵塔（００７８８）跌近２巴仙，報２﹒０１銀。聯想集團（００９９２）軟近１巴仙，報６﹒３９銀。不過，飛光纖光纜（０６８６９）就跟住魚缸有捧場踢高近半巴仙，報１７﹒４８銀。　＊銀娛業績差股價難再彈，中生製藥勁缸友買咗醒＊　　　　今日馬交賭佬一哥銀娛（０００２７）公布咗首季成績表，季績走樣相信缸友都估到，因為之前富瑞已經降低咗佢嘅「他屐」半成到５７銀，反映季績麻麻，不過今日季績出到嚟都仍然嚇一嚇啊！首季經調整ＥＢＩＴＤＡ，不論按月按季都跌８巴仙到４０億銀，收益亦同樣跌８巴仙到１３０億銀，所以今日都無再踢高之餘仲要捱沽，全日要跣低近２巴仙，報５１﹒０５銀。新濠（００２００）都跟跌近３巴仙，報１６﹒１６銀。澳博（００８８０）、永利馬交（０１１２８）、美高梅（０２２８２）各走低約１巴仙，分別報９﹒０９銀、１８﹒１６銀同１３﹒５４銀。金沙（０１９２８）就逆市升近半巴仙，報４０﹒０５銀。　　之前兩隻弱過藥煲嘅藍戰士醫藥佬，今日終於吐氣揚眉。中生製藥（０１１７７）今日仲做埋表現最好藍戰士，全日踢高近６巴仙，報８﹒１３銀。石藥（０１０９３）就揚逾２巴仙，報１４﹒２６銀，係表現最好紅戰士。其他醫藥佬就走勢麻麻，國藥（０１０９９）就仆低一格報２９﹒９５銀。遠大醫藥（００５１２）跌近２巴仙，報４﹒２６銀。藥明生物（０２２６９）同阿媽藥明康德（０２３５９）就齊齊升近１巴仙，分別報７７﹒０５銀同８５﹒９銀。　＊銷售數字好內房股要掃，本港地產抵大和籲撈底＊　　　穆迪畀咗佳兆業（０１６３８）Ｂ１嘅穩定信貸評級，今日大鏟高逾一成，報１４﹒８２銀。阿爺個統計局公布咗４月７０大中城市新建商品住宅銷售價格指數，成績唔錯按月踢高逾半巴仙，已經連升咗４８個月，按年仲鏟高近１１巴仙，其他內房佬就畀缸友掃貨。富力地產（０２７７７）飆高逾２巴仙，報１４﹒７４銀。龍湖（００９６０）踢高近２巴仙，報２７﹒８５銀。萬科企業（０２２０２）高近２巴仙，報２９﹒１銀。金茂（００８１７）走高近２巴仙，報４﹒７銀。世房（００８１３）踢高逾１巴仙，報２２﹒５銀。　　大和睇好本港地產佬，因為佢哋近期嘅股價受「中美講數」影響出現調整，但佢哋今年頭四個月都有唔錯嘅表現，相信之後租金收入應該會繼續造好，而家係機會吼低撈底，所以今日本港地產佬有捧場。恆隆地產（００１０１）鏟高近４巴仙，報１７﹒８６銀。新世界發展（０００１７）踢高近３巴仙，報１２﹒６２銀。新地（０００１６）走高近２巴仙，報１３４﹒８銀。長實集團（０１１１３）行前近２巴仙，報６１﹒７銀。信置（０００８３）高近２巴仙，報１３﹒２８銀。嘉里（００６８３）收高近２巴仙，報３２﹒３５銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》講述被情緒困擾真實個案，情緒病最終如何走出低谷？► 即睇