《魚缸博客》唔知係咪一石激起千重浪，繼１０月份有十家國企回購Ａ股之後，呢排有唔少公司決定回購股份，尤其大市跌到一仆一碌，依家恒指萬六關都危危乎之際，唔少財演都話恒指估值偏低，而好多有實力嘅股份都低到難以置信，所以都見有唔少公司開始回購股份或大股東增持。　　好似前日（４日）藥明生物（０２２６９）中途停牌，原因相信係集團喺嗰朝召開業務會議，之後發通告話，今年同明年上半年極具挑戰，未來兩年只會有單位數增長，結果股價最多急插近２５％。尋日股份復牌後，今日集團就宣布６億美元回購計劃，藥明生物股價今朝高見３２﹒１銀，升幅達５﹒８％，收復部分失地。不過，今日想講下隻金沙中國（０１９２８）。　　金沙股價喺１０月２９日低見１８﹒７４銀之後逐步回升，尋日已經上番２０銀，唔知係咪見股價低殘、估值偏低，所以金沙今日都發通告話，控股股東Ｌａｓ　Ｖｅｇａｓ　Ｓａｎｄｓ　Ｃｏｒｐ﹒　（ＬＶＳ）擬增持股權，並已促使間接全資附屬公司ＶＶＤＩ（ＩＩ）喺尋日同一間金融機構訂立購股交易，ＶＶＤＩ（ＩＩ）將會支付最多約１９﹒５億銀融資金額去購買金沙股份。集團話，以尋日收市價每股２０﹒２元計，融資金額大約等於９６６０萬股，佔約１﹒１９％股權。　　金沙截至今年６月底止中期賺１﹒７５億美金（１３﹒７億港銀），舊年同期就蝕７﹒６億美金（５９﹒６億港銀），大股東現時出手增持，或反映金沙未來有望恢復派息。股價今早曾迫近５０天線（２１﹒４８），技術上，上月底跌到１８﹒７４銀時，９日ＲＳＩ亦跌到２１，近日走強可視為技術性反彈，如可突破５０天線，首個阻力應該係２４銀，至於支持，皆因大股東已開始增持行動，相信１８至２０銀係重要支持，跌唔到幾多，建議喺２０﹒３銀買入，止蝕位可以定喺１８﹒４銀，目標２４銀。（ｐｃ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲第六屆國際信息商會議「最佳信息商」白金獎► 了解詳情