《小傳日記》是日（３０日）期結日「孖屐」窄幅波動，早市低開４６點之後反彈逾百點，但係２８３００點衝唔到上去，最高只見２８２７４點。大家都睇實花旗國個邊議息結果，而且外電指出花旗國貿談官方人員今晚喺上海和平飯店開餐，食住好西、聽住爵士樂咁傾下中美有咩大「雕」可以傾得埋，所以呢兩日都應該水靜河飛。但市悶股不悶，今日部分本地磚頭佬見資金撈底，九置（０１９９７）有追捧，而內險佬都表現唔錯，因為國壽（０２６２８）出盈喜所帶動。最終恆指收報２８１４６點，微升４０點，主板成交６１７﹒１０億銀跌一成；國貨收報１０８１８點，升３７點，升幅近半個巴仙。　　Ａ場今日走勢向好，上證綜合指數報２９５２點，升１１點；深證成分指數報９３９９點，升４４點。兩市合共成交３８４２﹒４２億人仔。　　大隻藍戰士方面，大象（００００５）跌１毫，報６３﹒８元；生發發（００３８８）升半巴仙，報２６６﹒４元；ＱＱ（００７００）微漲一蚊，報３７３﹒２銀；中移動（００９４１）升近半巴仙，報６７﹒５元；ＡＩＡ（０１２９９）微跌一格，報８２﹒５５元。　＊磚頭兩邊走九置表現優，觀望氣氛濃細價股受捧＊　　　噚日（２９日）香江人三點鐘唔少人停晒手，睇吓港澳辦罕就香江事務開嘅記者會，雖然會上內容無咩新意，不過最少無再以強硬支態回應最近嘅民眾示威事件，無好無壞消息，令「孖屐」鬆一口氣，令噚日因為不安情緒跌落嚟嘅本地磚頭佬，今日部分股價都好返啲，其中以九倉置業為升幅最大全日彈逾２巴仙，報４９﹒６銀，做埋表現最好藍戰士；太地（０１９７２）都唔差升返近半巴仙報２８﹒８銀。不過，其他幾個就繼續扁嘴囉，其中新世界（０００１７）同恆地（０００１２）包辦表現最差藍戰士首兩位，各跌１巴仙分別報１１﹒１２銀同４１﹒０５銀。會德豐（０００２０）、嘉華國際（００１７３）同嘉里建設（００６８３）都各跌約１巴仙，分別報５０﹒８銀、４﹒２１銀同３０﹒１５銀，　　是日期結，啲錢都唔大舉流入藍戰士，加上中美貿談同聯儲局議息在即，啲錢繼續快狠準炒吓細價魚毛就算。之前散戶熱炒嘅平安證券（００２３１）之前連跌兩日之後，今日再以大成交大彈四成三報０﹒１７１銀，係升幅最大嘅魚毛。同樣以大成交抽上緊隨其後嘅弘達金融（０１８２２）就飆三成七，報０﹒０４１銀：中海重工（００６５１）急升一成八，報０﹒０２銀。兩隻半新股都有好表現，其中羚邦（０２２３０）抽高近９巴仙，報０﹒３１銀；鷹普精密（０１２８６）下晝突然有多個買盤掃貨，其中大摩同花旗淨被動買入呢隻魚毛合共逾９００萬銀，令佢全日急上一成九，報４﹒２銀。　＊內房數據好潤地運氣到，手機各不同舜宇路最通＊　　　上海易居房地產研究院就話，１至６月易居研究院監測的１００個城市新建商品住宅成交均價為每平方米１４０６５人仔，按年漲１４﹒３巴仙。與此同時，１至６月份漲幅略微擴大，所以神州磚頭佬今日有缸友愛錫，大多數表現都唔錯。其中潤地（０１１０９）同世房（００８１３）都跳起１巴仙，分別報３４﹒３５銀同２２﹒２５銀。龍湖（００９６０）彈起不足半巴仙，報２９﹒６銀。綠城（０３９００）踢高近５巴仙，報６銀。不過，新城發展（０１０３０）日前公布以２７﹒３７億人仔賣多八個地產項目，今日再跌３巴仙報６﹒８２銀。　　手機設備佬喺分叉路上各自走，其中舜宇（０２３８２）獲美銀美林早前輕微調升對今年至２０２１年嘅每股盈利預測２巴仙，目標價由９５銀升至１１０銀，舜宇埋單彈起逾半個巴仙，報９３﹒７銀。比亞迪電子（００２８５）彈起近１巴仙，報１１﹒５２銀。瑞聲（０２０１８）漲不足半巴仙，報４３﹒４５銀。富智康（０２０３８）同鴻騰精密（０６０８８）齊齊軟腳２巴仙，分別報１﹒０３銀同３﹒２７銀。　＊內險佬上望太保價最猛，內銀佬抬頭工行獨憂愁＊　　　內險佬今日幾乎全部向上望，新保（０１３３６）料中期多賺八成，全日跳高近３巴仙，報３９﹒５５銀，喺全日表現最佳國貨佬。太保（０２６０１）亦衝上近３巴仙，報３４﹒２５銀。國壽（０２６２８）公布預期中期多賺逾倍，主要受惠投資收益增加同稅費減少，埋單起飛逾１巴仙，報２０﹒４５銀。平保（０２３１８）彈起亳半子，報９５﹒１５銀。財險（０２３２８）走高２巴仙，報９﹒６４銀。　　內銀佬都一樣唔輸蝕，大多數都抬起頭，其中建行（００９３９）彈不足半巴仙，報６﹒１５銀。郵儲行（０１６５８）發行全國首單債轉股專項債權融資計劃，埋單亦起飛不足半巴仙，報４﹒５４銀。民行（０１９８８）同中國銀行（０３９８８）各升一格，分別報５﹒４８銀同３﹒２３銀。招行（０３９６８）隻腳都無咩力，跳起半巴仙，報４０﹒１５銀。不過，工行（０１３９８）軟不足半巴仙，報５﹒３７銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇