《魚缸博客》比亞迪（０１２１１）一話發盈喜，股價就插水，其實大家睇汽車銷售數據都知道ＢＹＤ咩情況，要炒一早炒左，所以股價Ｐｒｉｃｅ　ｉｎ左，今日消息一出咪插水，唔驚喜亦都唔意外；反而比較意外係隻浙江世寶（０１０５７），今日一支大陽係低位爆上，真係估你唔到。　　消息面上，浙江世寶公布，預期截至去年１２月３１日止年度淨利潤介乎７５００萬至８５００萬元人民幣，升３﹒７至４﹒４倍，扣除非經常性損益後的淨利潤為６２００萬至７２００萬元人民幣，２０２２年度相關虧損９６６萬元人民幣，每股盈利９至１１分。　　該集團指，期內受益於汽車行業整體表現良好，液壓循環球轉向器及電動助力轉向系統產品銷售上升。同時，智能電動循環球轉向器、智能電液循環球轉向器、管柱和中間軸等新產品陸續開始量產，帶來新的收入來源，使營收上升、毛利率改善，淨利潤同比大幅上升。　　近期國產車開始再度轉型，一啲細型、平價車電動車反而好受歡迎，雖然冬天公里數續航都係得２００幾公里，但由於中國充電站建設日趨成熟，要搵充電站亦唔難，造就好多小情侶小夫妻都中意買啲十萬樓下嘅全新車，去旅行又得、去接細路買菜又得。不過要做好路線規劃，否則未捱到下一個充電站就跪低都幾尷尬。　　受消息影響，今日浙江世寶Ａ股直接漲停，連帶Ｈ股都急升兩成。自從公司係２０２３年恢復營利之後，股價都曾經上過３﹒６５，之後回落兩蚊水平。３月份業績期又就快到，預計短期內又有機會再度炒作，股價可能重返三蚊都唔一定！《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》與你分享被性騷擾解決辦法，大量真實個案，唔同場所如何提防及應對？► 即睇