《小傳日記》神州同花旗國開展左近兩個月以嚟首次嘅經貿磋商，兩國官員仲一齊參觀花旗國農業地區。不過，花旗國總統侵侵（特朗普）嘅高級顧問白邦瑞就透露，如果兩國唔快啲達成協議，花旗國會繼續施壓，將關稅調高五成，甚至一倍都唔係無可能，搞到花旗國魚缸隔晚（１９日）都冇乜料到。　　香江今朝高開６３點報２６５３２點，之後走勢反覆，最多見過２６５６４點升９５點。午後，大隻藍戰士唔爭氣，ＡＩＡ（０１２９９）繼續下試，拖低魚缸最低見２６４１０跌５８點，險守２０天線（約２６３９０點）。最終，魚缸埋單唔見咗３３點，報２６４３５點，全日高低波幅只有１５３點，並已經係連續五日下跌兼五連陰，蒸發咗９１７點或超過３巴仙！主板成交９４３﹒８４億銀，較上日急增三成三。　　國貨報１０３７５，跌９點。申洲國際（０２３１３）被控股股東折讓６巴仙減持，全日急挫近４巴仙，報１０４銀，係全日包尾藍戰士。　　Ａ場方面，上證綜指報３００６，升７點或唔夠半巴仙，深成指數報９８８１，升２９點或升唔夠半巴仙，兩市成交５４６９﹒２１億人仔。　　大隻藍戰士方面，大象（００００５）被美銀美林比咗個「中性」評級，仍升半巴仙，報６０銀。ＱＱ（００７００）主席兼ＣＥＯ馬化騰卸任騰訊微信法定代表人，滑唔夠半巴仙，報３３７﹒６銀。生發發（００３８８）無升跌，報２３０﹒２銀。ＡＩＡ續挫逾１巴仙，報７５﹒４５銀，連跌３日。神州移動（００９４１）今再軟近半巴仙，報６４﹒６銀，更加連跌５日，累跌超過４巴仙，慘！建行（００９３９）微升唔夠半巴仙，報５﹒９７銀。　＊神州拓交通鐵路股蜂擁，行業現商機光伏股起飛＊　　　神州力谷經濟，喺最新出爐嘅《交通強國建設綱要》中提出「交通強國」嘅概念，強調新型載運工具同重載列車研發，加強綠色交通，基建股有炒作。中鐵（００３９０）揚逾３巴仙，報５﹒２１銀。中交建（０１８００）漲逾６巴仙，報６﹒７銀，亦係最佳表現國貨佬。中鐵建（０１１８６）飆逾３巴仙，報９﹒３７銀。鐵建裝備（０１７８６）起哄近３巴仙，報１﹒３８銀。中車時代（０３８９８）亦急升近２巴仙，報３４﹒５５銀。　　神州國家工信部又有新搞作，正準備開展智能光伏試點示範，目的係培育一批智能光伏示範企業，同埋支持建設一批智能光伏示範項目，光伏股當然生猛跳起！其中，信義光能（００９６８）踢高近４巴仙，報５﹒２銀，仲要破埋頂！保利協鑫（０３８００）漲逾１巴仙，報０﹒３５５銀。福萊特玻璃（０６８６５）走高逾１巴仙，報４﹒５５銀。卡姆丹克（新）（００７１２）飆逾９巴仙。協鑫新能源（００４５１）升近２巴仙，報０﹒２９５銀。　＊手機股散水舜宇唔進取，出貨惹憧憬晶片股好景＊　　　繼蘋果推出新「唉瘋」之後，華為亦都公布全新嘅５Ｇ手機「Ｍａｔｅ３０」系列，採用四個主鏡頭，但仲喺行緊Ａｎｄｒｏｉｄ系統。舜宇（０２３８２）今日盤中高見逾一年高位，但尾市腳軟，滑近半巴仙，報１１９﹒７銀。富智康（０２０３８）反彈逾３巴仙，報０﹒９９銀。其他手機設備佬亦現獲利盤，瑞聲（０２０１８）挫近３巴仙，報４５﹒８銀。通達（００６９８）滑逾１巴仙，報０﹒６８銀。丘鈦（０１４７８）走低近３巴仙，報９﹒２４銀。　　華為同小米今年都會推出５Ｇ手機，而且今年蘋果公司同三星推出嘅手機都幾受缸友歡迎，晶片股借勢炒上。中芯（００９８１）升近２巴仙，報１０﹒７２銀。華虹半導體（０１３４７）急漲近半成，報１７﹒６８銀。ＡＳＭ太平洋（００５２２）彈高逾１巴仙，報１００﹒１銀。腦洞科技（０２２０３）揚近７巴仙，報０﹒４８銀。上海復旦（０１３８５）挫逾４巴仙，報８﹒２３銀。　＊港鐵復修好唔駛被當草，新盤極速清新地有得升＊

　　作為半隻磚頭佬嘅港鐵（０００６６），喺出軌事故後第二日終於大致復修完，消息推動股價一度修復埋廿天線（約４６﹒３３銀），最終升唔夠半巴仙，報４５﹒９５銀。魚缸悶局，公用股有追捧，中電（００００２）醒神漲近３巴仙，報８１﹒９銀，更加係全日表現最佳藍戰士！煤氣（００００３）揚近１巴仙，報１５﹒６２銀。電能（００００６）升近１巴仙，報５２﹒９５銀。長建（０１０３８）升近１巴仙，報５３﹒０５銀。　　深受貿易戰同社會運動影響嘅本地磚頭佬，今日終於吐氣揚眉。噚日新地（０００１６）推新盤，點知即日沽清，新地全日升近１巴仙，報１１４﹒５銀。其他磚頭佬亦紛紛順勢上揚，新世界（０００１７）冇料到，報１０﹒０８銀。恆地（０００１２）升近半巴仙，報３８﹒１５銀。嘉華國際（００１７３）就勁升超過３巴仙，報４﹒２４銀。恆隆地產（００１０１）亦企穩無升跌，報１７﹒７銀。收租佬都有唔錯表現，希慎（０００１４）微漲唔夠半巴仙，報３１﹒２５銀。冠君（０２７７８）跳起近兩巴仙，報５﹒１７銀。鷹君（０００４１）一度最多跳起超過３巴仙，但埋單倒跌唔夠半巴仙，報２６﹒６５銀。泓富（００８０８）彈超過一巴仙，報２﹒９４銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情