《魚缸博客》魚缸又跌穿１６０００點，所謂「鑽石能量底」都穿埋，其實鑽石都係炭，幾堅硬都好，只要力量夠大都會碎裂，所以奉勸大家唔好再信咩鑽石底啦。　　咁係咪代表個市無嘢好買？咁係因為你悲觀，我睇到防守性股份帶嚟嘅好處，講緊就係隻百度（０９８８８），今日個市跌到咁佢好似咩事都無，無他嘅，因為佢已經跌突左啦。早幾日新聞話百度旗下隻ＡＩ被軍方採用，市場憂慮會唔會因為咁而被美國抵制。　　隨後百度官方就梗係出來解話啦，連消息來源嘅南華早報都出更正聲明，所以股價叫做企返穩１００蚊水平。博客就覺得，百度係呢個跌市入面算係防守性比較強，唔係因為間公司點點點樣勁，係因為佢之前啲恐慌性拋售已經震散啲信念唔夠嘅人出嚟，所以按道理就應該跌無可跌架啦。　　集團強調，文心一言面向公眾開放，並被公眾廣泛使用。相關學術論文由一所中國大學的學者發表，其中描述論文作者如何設計向若干ＬＬＭ提出問題、並獲得回覆的過程，任何用戶在與生成式ＡＩ工具交互時，均可使用這個功能。該集團致力於以符合適用法律法規及最佳公司治理實踐方式運營ＡＩ相關的產品和業務。　　講到咁，信唔信就閣下自理，不過現價都係１０２蚊左右，博客覺得係跌市入面佢又幾值得買，不過話番兩頭，無嘢係無堅不摧，如果跌穿１００蚊都唔好企硬啦！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】的士業「放蛇」舉報Uber，政府應否將網約車合法化？你是否支持該類自行「放蛇」行為？► 立即投票