《魚缸博客》聯儲局暗示出年會減息起碼０﹒７５厘之後，美股繼續升，道指仲創埋歷史新高。外圍炒到㷫恰恰，香港股民早排就㷫過辣雞，依家當然開心番啲啦，因為恒指好似真係企穩萬六點，加上今朝曾經升超過５００點，真係似見底喎！之但係，依家恒指成分股入面，中資企業佔咗較大比重，就算香港因為聯匯制度關係，出年跟住美國減息，中資企業又受惠到幾多，就算有都好間接。講到尾，市場都係搵個藉口將個市推番高少少，唔使收喺全年低位咁樣衰！　　依家都係炒股唔炒市，今日講吓隻信義光能（００９６８），聽個名就業務同環保能源相關。信義光能就係主要從事生產同銷售太陽能玻璃產品、發展同營運太陽能發電場，同埋提供工程、採購同建設服務。　　業績方面，集團截至今年６月３０日止半年純利接近１４億港銀，比舊年同期跌近２７％，每股盈利１５﹒６３仙，派中期息７﹒５仙。集團派息算係穩定，預期周息率接近４﹒８厘，息率當然唔算吸引，買都係博個價升，賺多啲。集團曾經喺２０１７年曾經十供一，望番截至２０１６年１２月底止未期業績，集團有現金及現金等價物逾８﹒４３億銀，依家就有超過３９億銀，唔使供股啦，加上個股價依家做緊４個幾，較２０２１年高位２４銀跌咗八成，供股不如趁低回購好過啦！　　技術上，信義光能星期一（１１日）跌到３﹒８８銀之後，最終以十字星收喺４﹒０８銀，之後兩輕微回調整固後再升，今朝最高升到４﹒４８銀，迫近５０天線（４﹒５），最多升超過９﹒５％，建議分兩注買入，現價一注，第二注喺４﹒２銀，或者股價連續兩日收高過５０天線之後入埋，止蝕位放喺３﹒５銀，首個目標睇６銀，中線望７﹒５銀。（ｐｃ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】本港水費近30年不變，水務署表示有需要調整，以改善經營狀況，你認為加水費可否接受？► 立即投票