《小傳日記》農曆新年伊始，港交所（００３８８）都準備迎接新管理層，除咗陳翊庭仲有唔夠半個月就接任做首位港交所女ＣＥＯ，做咗兩年嘅主席史美倫亦都宣布退任。早幾日港交所開年，史美倫就高調反駁近期熱議嘅「香港玩完論」，大力唱好魚缸一定可以谷低反彈。　　比起史美倫嘅「賀年式」唱好，即將由政府委任接棒做港交所獨董嘅陳健波就誠實得多。身兼保險界立法會議員嘅陳健波就一直有喺自己嘅ＹｏｕＴｕｂｅ　ｃｈａｎｎｅｌ拍片做時事評論，最新一條片入面就坦誠香港正係面對轉型挑戰，但係自身優勢並無改變，仍然可以靠自身努力「翻身」。　　點樣翻身呢？陳健波就答得比較精警，提出三大要點。第一點就已經有啲辣度，強調要發揮一直以來識諗計、識轉彎嘅打不死精神，唔好旨意外資突然回流，亦唔好一心諗著阿爺會大力救港，一定要靠自己努力翻身。單係呢一點就已經幾當頭棒喝，事實魚缸經常都有一個意識就係靠北水打救，但就唔記得「水能載舟，亦能覆舟」，正如今日北水一回歸魚缸就捱沽，邊有得靠北水打救？雖然政府近期開埋港股人仔櫃枱，不過對魚缸成交都係九牛一毛，所以就算加多幾多條水喉，無水就係無水，一定要諗辦法引活水入嚟。　　至於第二點就係要降低香港做生意成本，要政府「的起心肝去做，只要條件吸引，一定會有錢流返入來。　　而最後一點又係精警。近期港人都鍾意北上消費，訪問親咁多北上嘅人都答上面又平又好服務，而陳健波就提到各行各業都要認真諗辦法留住客人，「提升服務水平」，加埋好服務同產品，就可以「有得爭」。　　陳健波即將上任做獨董，如果佢真係咁心水清嘅話都真係有利後市，希望真係可以為魚缸提供返多啲有建設性嘅措施啦，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》與你分享被性騷擾解決辦法，大量真實個案，唔同場所如何提防及應對？► 即睇