《魚缸博客》自本月１９日，中國證監發布５項資本市場對港合作措施以來，恒指升勢未停過。上周恒指全周累升１４２７點，按周升８﹒７９％，唔單止多次改寫今年新高，仲創下自２０１２年以來嘅單周最高升幅。翻查２０２２年１１月初，恒指創下十三年低後，第一周反彈亦相當強勁，但當時嘅升幅都不過係８﹒７３％。可想而知，今次中證監對港５項措施嘅威力。　　中證監發布嘅《５項資本市場對港合作措施》，旨在促進兩地資本市場協同發展。措施包括放寬滬深港通下股票ＥＴＦ合資格產品範圍、將ＲＥＩＴｓ納入滬深港通、支持人民幣股票交易櫃台納入港股通、優化基金互認安排，以及支持內地行業龍頭企業赴香港上市。有分析認為，呢Ｄ措施有助於擴濶交易產品種類、提供更多便利同選擇，促進兩地資本市場融合，助力人民幣國際化。其實，香港同內地嘅金融合作過去幾年一直都無停過，今次嘅措施只能話再次擴大合作範圍，開放更多內地資金流入港股。　　要吸引資金南下，都要港股本身估值吸引先得。如果唔係，就算你全方位開放，都唔一定有人買。首先，恒指市盈率維持在大約９倍左右，在全球主要股市中偏低。其次，港股具有Ａ股市場缺乏嘅大型科技股，如騰訊（００７００）、美團（０３６９０）、阿里巴巴（０９９８８）等。因此吸引咗唔少南下資金熱捧，南下資金成為呢一波升浪嘅助力，已經連續２０個交易日錄得淨買入。　　　恒指從年初低位１４７９４至今日高位１８０３１，累積升幅超過兩成，已經進入技術性牛市。究竟今次呢波升浪可以維持幾耐，上面仲有幾個空間可以升？參考２０２２年１１月初至２０２３年１月底嘅反彈浪，當時大約持續升咗３個月，恒指從低位計總共升咗７０００幾點。不過，而家地緣政治轉趨複雜，除咗原有嘅俄烏克戰事，仲有以巴衝突，加上今年係美國大選年，預料中美之間嘅博弈依然會影響大市氣氛。不過，可以預計，短期內恒指依然睇好。只係，升得多都要小心適當下調同整固，但大市整體向上嘅趨勢不變。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動