《開市Ｇｏｏｄ　Ｍｏｒｎｉｎｇ》花旗國公布新一份點陣圖後環球孖屐一片歡騰，連香江魚缸都有份慶祝，今日一度升４３０點，高見１６９７３點；最終收市仍有３２０點進賬、收報１６８６３點，升幅近兩巴仙，成交１１８０億銀。不過升嚟升去都衝唔上萬七關，唔通魚缸只係連日回調後嘅技術性反彈？係咪仲未有條件企得穩萬七關？至於神州自２月大降ＬＰＲ後，人仔係咪已經算穩定返？阿爺短期內仲有無需要進一步提高流動性措施？　　至於美團（０３６９０）將喺聽日收市後放榜，各間大行對佢上年第四季Ｎｏｎ－ＧＡＡＰ預測都睇到相對樂觀，估佢有至少倍數式增長；同時睇好埋收入增長同新業務經營虧損收窄。不過前值即係２０２２年第四季份數仍受住疫情影響，變相今次份數可能仲有水份！美團無否認又無證實退出社區團購業務，其實都唔算咩好消息，因為社區團購服務推出三幾年以來仲係蝕緊，唔「斬腳趾」背後有咩考量？如果遲遲仲未錄得盈利，驚唔驚變成持續拖累盈利能力嘅「米缸老鼠」？　　銅精礦加工費近期暴跌，原因何在？加工費下跌對整體生產鏈有咩影響？明明行內上星期先喺首都開完會傾點應對，咁快輪到阿爺召見，觀感咁差、行業現況面對緊咩燃眉之急？ＬＭＥ銅價對上一次跌咁甘要數到１１個月前，當時個幾月就冧逾一成四，今次又會唔會悲劇重演？　　聽日（２２日）《開市Ｇｏｏｄ　Ｍｏｒｎｉｎｇ》搵嚟ｉＦＡＳＴ　Ｇｌｏｂａｌ　Ｍａｒｋｅｔｓ副總裁溫鋼城，同大家分析上述股份、大市走勢，當然唔少得分析其他焦點股份！歡迎大家提問投資及其他股票問題。記得準時８：５５ａｍ，昅實《經濟通》ＮｅｗｓＴＶ直播節目－－《開市Ｇｏｏｄ　Ｍｏｒｎｉｎｇ》喇！或者ｃｌｉｃｋ入嚟ｈｔｔｐｓ：╱╱ｗｗｗ﹒ｙｏｕｔｕｂｅ﹒ｃｏｍ╱ｗａｔｃｈ？ｖ＝ｐ６ＷｆｄＶＺＥｋｍＥ　打個卡先又得！

《說說心理話》與你分享應對性騷擾三部曲，減輕心理陰影創傷、提升自我肯定方法 ► 即睇