《魚缸博客》隔晚理想汽車（０２０１５）ＡＤＲ升咗９％，原本以為有乜嘢利好消息，卻原來集團公布多款汽車減價消息。今日理想汽車開市升６％，搞到我一頭霧水。同上次公布業績後，理想ＡＤＲ急升一成九唔同，嗰次係因為業績好過市場預期，股價被炒上好合理。今次係汽車減價，股價都可以照炒上？唔通市場預期減完價可以做多好多生意？並進一步提高市場佔有率？但集團和市場都無提供相關預測。　　根據理想汽車官微消息，理想２０２４款Ｌ７　Ａｉｒ官方價格調整為３０﹒１８萬人仔，Ｌ８　Ａｉｒ售價調整為３２﹒１８萬人仔，兩款車都減咗１﹒８萬元。而２０２３款理想Ｌ７　Ａｉｒ、Ｌ８　Ａｉｒ仍繼續售賣。　　另外，麥肯錫中國發布２０２４年中國汽車消費者洞察報告指出，中國消費者對新能源汽車接受度首次出現下滑。２０２３年，有２２％車主表示後悔購買咗純電動車，並表示下次買車時，將不再考慮新能源汽車，而該比例在２０２２年嘅調研僅為３％。當中，三、四線城市電動汽車車主「反悔率」高達５４％，明顯高於一、二線城市車主嘅１０％。三、四線城市電動汽車車主之所以咁不滿，最主要係充電唔方便。　　過去幾年，內地電動車高速發展，但喺高產能、高增長率嘅背後，除咗傳統嘅減價促銷手法之外，就只有喺質方面不斷提升。雖然，理想汽車被視為民營電動車新勢力，備受睇好。但無論從規模，定係技術層面都面對唔少挑戰。產量方面與龍頭比亞迪（０１２１１）嘅差距太遠。技術方面，今年仲加入小米（０１８１０）嘅競爭，所以，無論係銷量定係質量方面，今年都要面對唔少挑戰。現階段炒唔炒得過？筆者認為上升空間唔係無，只係唔會太多，跟炒就要小心。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】內地再增8個自由行城市，餐飲業倡設大灣區身份證，以便利更多人來港消費，你是否認同？► 立即投票