《小傳日記》近期有內媒報道，巴巴（０９９８８）旗下１６８８好快就會全面接入淘寶，「１６８８嚴選店」、「１６８８企業自採店」同「１６８８工業行家選」作為巴巴直營店，近排已經喺淘寶開始運作。　　有返咁上吓年資嘅缸友都會記得，１６８８就係巴巴第一次喺魚缸掛牌嘅冧把，２００７年上市到２０１２年退市，玩謝當年唔少股民。繼承著呢一段陳年往事，如今１６８８繼續係巴巴旗下嘅Ｂ２Ｂ商務業務平台，係中小企採購嘅開端，如今接入淘寶，即係將１６８８嘅面向更加普及，亦都更加有利小微企業接觸到採購平台。　　巴巴ＣＥＯ吳泳銘上年底就提到，除咗「六大業務」之外，巴巴仲有新一批「戰略創新業務」，孖屐稱之為「阿里四小強」，分別係「１６８８」、「閑魚」、「釘釘」同「夸克」。１６８８係Ｂ２Ｂ業務，閑魚係二手買賣網站，反而「釘釘」同「夸克」就比較少聽，其中釘釘算係具有ＡＩ概念嘅一站式即時通訊ａｐｐ，主要係針對日常公司應用，而「夸克」就更加少見兼難讀。　　據講唔係吳泳銘點名「四小強」出嚟，夸克內部員工都唔知自己原來係集團睇好嘅四小強之一。夸克喺物理學上係比原子更細嘅組成部分，亦都正好對應夸克嘅目標，就係要碎片化咁將唔同線上應用需求針對性提供。喺夸克版面入面，包含咗搜尋、網盤、掃描、學習、文件、健康、小說等等，可以話比起ＡＩ可以一站式做到更加多嘅細緻功能應用。　　雖然夸克喺８０後、９０後並唔普遍，但喺神州對於００後學生層面嚟講，夸克就更為普及。據夸克員工提到，有超過一半以上嘅夸克用家都係２５歲以下。一站式多功能，可以話係奶媽式平台為學生提供方便做功課嘅便利，難怪可以獲得ＣＥＯ青睞，更加具備ＡＩ概念嘅潛質。　　暫時「四小強」都未喺投資者嘅焦點入面，但乘著ＡＩ概念而上，呢四小強都有望可以喺未來提升曝光率，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】內地再增8個自由行城市，餐飲業倡設大灣區身份證，以便利更多人來港消費，你是否認同？► 立即投票