《小傳日記》隔晚花旗「孖屐」當旺，除咗因為中美簽好個貿易協議之外，美墨加貿易協議又係參議院通過修改，雙重消息下三大指數都破晒頂。反觀香江魚缸呢邊，今早開市升百點好似幾有景咁，之後神州公布去年ＧＤＰ增長６﹒１％，符合市場預期，恆指一路飆上去２９１０１點，升最多２１８點，但臨近收中午市至前升幅突然全部蒸發兼倒跌１２點。午後魚缸都係死氣沉沉咁，係咁升下跌下正負三幾十點，但尾市又突然抽高，真係嚇死寶寶！不過，最終恆指都企穩二萬九收市，收報２９０５６點升１７３點或逾半巴仙，主板成交１１１３﹒６１億銀升近一成。國貨報１１４１９點，升９１點或近１巴仙。　　Ａ場都係悶市牛皮格局，上證綜指收報３０７５點，升１點；深證成指收報１０９５４點，跌１３點。兩市合共成交６０７４﹒１６億銀。　　大隻藍戰士方面，今日大家都無咩力氣咁，大象（００００５）升近半巴仙，報６０﹒１５銀；生發發（００３８８）漲近１巴仙，報２８０銀；ＱＱ（００７００）軟近半巴仙，報３９９銀；中移動（００９４１）微升２亳子，報６６﹒２銀；ＡＩＡ（０１２９９）潛近１巴仙，報８６﹒６銀。

＊煤氣好盞鬼升幅真架勢，中生獲大獎股民爭住搶＊

　　一年一度業績期就快開始，唔少大戶都密鑼緊鼓，睇下有咩股分可以提早「財息兼收」，煤氣（００００３）就梗係人中之龍啦！年年十送一而且派息穩定，所以呢兩日股價都飛高高，今日再升近２巴仙，報１５﹒９銀；中電（００００２）亦升近１巴仙，報８３﹒４銀；電能實業（００００６）就微跌一格報５８﹒２銀；港鐵（０００６６）新鐵路線將開通，全日彈起近２巴仙報４７﹒８銀；領展（００８２３）飛起逾近２巴仙，報８６﹒２５銀。　　話說中生（０１１７７）旗下公司叻叻豬！聯同北京大學拎到國家科學技術進步二等獎，咁難拎都拎到，股價梗係升一升賀賀佢！中生踢高近４巴仙，報１１﹒７４銀。石藥（０１０９３）都抽高半成，報１８﹒９２銀，有消息指佢係注射劑帶量採購中標機會高，因為報價最低，消息好梗係做埋今日最佳藍戰士啦！國藥控股（０１０９９）披繩抽水４０億銀，跌逾１巴仙，報２９﹒１銀；翰森製藥（０３６９２）飛起近４巴仙，報２７﹒７５銀；百濟神州（０６１６０）漲近３巴仙，報１０２﹒７銀。

＊連連破頂後物管被拋售，高佬話遜色中海外壓抑＊

　　連日見頂嘅物管佬，加上日前雅生活（０３３１９）遭股東減持後，搞到唔少缸友都見好就收，今日終於有小幅回吐。雅生活服務（０３３１９）挫近２巴仙，報３０﹒１５銀；彩生活（０１７７８）跌逾１巴仙，報４﹒４７銀；中海物業（０２６６９）滑近１巴仙，報５﹒２４銀；昨日破頂嘅碧桂園服務（０６０９８）都回吐近２巴仙，報２９﹒１５銀。但係俾中金維持跑贏大市評級嘅永升生活服務（０１９９５），就叻仔升逾４巴仙，報６﹒９９銀。　　近日大行高佬就發表報告唱淡中海外（００６８８）同埋萬科（０２２０２），話中海外表現比同業遜色，下調評級至「中性」，全日趴低超２巴仙，報２９﹒６５銀，中海外仲係今日最慘慘豬藍戰士；而萬科就話佢雖有拓展業務彌補核心業務倒退，但要見成效長，評級被降至「沽售」，微升不足半巴仙，報３２﹒２銀。而其他?房佬都趴低，華潤置地（０１１０９）同融創 （０１９１８）跌近１巴仙，分別報３７﹒４銀及４４﹒９５銀；碧桂園（０２００７）挫逾１巴仙，報１２﹒０８銀

＊原油有人吼三桶油獲購，貿易前路明出口佬歡迎＊

　　花旗國近日就同神州簽署首階段協議，而最新公布嘅製造業指數亦都回升至八個月高，部分出口佬繼續向上彈起。敏華控股（０１９９９）升近１巴仙，報６﹒５３銀；申洲國際（０２３１３）揚近半巴仙，報１１７﹒３銀；創科實業（００６６９）踢高２巴仙，報６７﹒３銀；耐世特（０１３１６）漲逾１巴仙，報６﹒８３銀。德昌電機（００１７９）則跌１巴仙，報１８﹒５銀。　　喺噚日花旗國參議院就通過咗美墨加貿易協議，加上近日同神州簽咗首階段協議，「孖屐」憧憬利好原油需求，隔晚油價上揚，油佬都跟著分杯一羹。另外，有傳中石油（００８５７）同中石化（００３８６）將同時換帥，前者企穩報３﹒９４銀，後者揚過半巴仙，報４﹒７２銀。中海油（００８８３）亦升近１巴仙，報１３﹒５２銀。周末愉快！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

etnet榮獲HKEX Awards 2023 「最佳表現證券數據供應商」大獎► 了解詳情