《小傳日記》花旗國經濟數據同企業獲利強勁，孖屐睇好聯儲局維持寬鬆貨幣政策，美股上周五（７日）造好。不過香江魚缸明顯就跟唔上啦，高開後最多升２２６點，好快就無力調頭倒跌。跌市大元兇就係美團（０３６９０）ＣＥＯ喺網絡貼文，搞到美團版質低成７巴仙，拖累恆跌近１００點。不過油股及藥股托一托，大市全日輕輕跌１４點報２８５９５，主板成交較上日多近７巴仙至１６３５﹒１２億銀。國企指數報１０６５１，跌４７點或跌唔夠１巴仙。科指跑輸大市報７８８６，跌６８點或跌近１巴仙。　　Ａ場方面，上證綜合指數報３４２７，升９點；深證成份指數報１３９１７，跌１５點，成交４５５２﹒８２億銀人仔。　　重磅藍戰士方面。小米（０１８１０）成立私募基金，雷軍做埋受益人，本來早上仲升緊，但其後隨市回吐唔夠１巴仙，報２５﹒２銀；港交所（００３８８）有中證監否認打算收緊公司赴港上市規定，逆市輕輕漲唔夠１巴仙，報４５６銀。有傳香江政府研究傾向將消費券分兩期派，經營商場嘅九置（０１９９７）亦揚升逾２巴仙，報４７﹒１５銀。

＊ＣＥＯ隨寫詩累股瀉唔少；疫苗屬緊急藥佬熠生輝＊

　　美團ＣＥＯ王興喺社交媒體飯否轉發唐朝詩人章碣嘅《焚書坑》，詩中提到秦朝焚書坑儒，但推翻秦朝嘅項羽同劉邦都係無讀過書嘅人，被指暗諷神州政權。美團盤中最多急插逾９﹒８巴仙低見２５５銀，午後王興解釋係要提醒自己最危險嘅對手並唔係預料之中嘅人，股價之後冇太大起色，收插逾７巴仙，報２６２﹒８銀，市值一日之內無咗１２００幾億。ＱＱ（００７００）旗下遊戲子公司Ｓｕｐｅｒｃｅｌｌ喺一單網絡遊戲功能專利訴訟中敗訴，被判要賠約７﹒２億銀；另外騰訊手機管家被指違反中國網絡安全法規定，收集同提供服務無關嘅個人訊息，收軟近１巴仙，報５９５銀。數字人仔支付寶都有股份玩，阿里巴巴（０９９８８）仍碌低逾２巴仙，報２１５﹒２銀。原首汽約車ＣＥＯ魏東加入百度（０９８８８），負責做Ａｐｏｌｌｏ共享無人車業務，百度唔見逾１巴仙，報１８３銀。　　世衛組織宣布，將國藥集團同中國生物北京生物製品研究所研發嘅新冠疫苗列入緊急使用清單，國藥（０１０９９）彈近７巴仙，報２５﹒８銀。復星醫藥（０２１９６）同ＢｉｏＮＴｅｃｈ為新冠疫苗產品本地化生產及商業化而擬設立一家合資公司，各持５０巴仙股權，復星抽高逾２５巴仙，報６２﹒６銀。其他疫苗佬齊齊彈起，康希諾（０６１８５）升近３巴仙，報３１２銀；開拓藥業（０９９３９）抽高逾３巴仙，報６５銀。

＊油價走勢強三桶油向上；廢鋼也有價資源佬高掛＊

　　數據顯示神州４月出口加速增長，民間調查亦顯示服務業活動強勁擴張。油價向上帶動三桶油造好，中海油（００８８３）同中石油（００８５７）齊齊抽高近５巴仙，報９﹒１２銀同３﹒２２銀，係今日表現頭二大標青藍籌。中石化（００３８６）跳近２巴仙，報４﹒２３銀。　　內媒報道，鋼價延續４月漲勢，從鋼坯到鋼材、原材料、再生鋼鐵原料等，鋼市已步入全面上漲的牛市，多間鋼廠上調廢鋼採購價，鞍鋼（００３４７）跳高近７巴仙，報６﹒２３銀；馬鋼（００３２３）鏟高逾一成四，報４﹒６８銀；重鋼（０１０５３）炒高近１４巴仙，報３﹒０６銀。其他資源佬都起飛，鐵貨（０１０２９）飆近３７巴仙，報０﹒４６５銀；江銅（００３５８）彈起逾１２巴仙，報２２﹒７５銀；俄鋁（００４８６）起哄升逾３巴仙，報５﹒７６銀。請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇